Úkimet munai-gaz himiiasy óndirisiniń kólemi aitarlyqtai óskenin málimdedi, dep habarlaidy "Ult aqparat".
QR Premer-Ministriniń orynbasary Roman Skliar depýtattyq saýalǵa bergen jaýabynda munai-gaz himiiasy ónimderiniń óndirisi 2 mln tonnaǵa deiin artatynyn aitty.
«Búginde elimizde jylyna shamamen 870 myń tonna munai-gaz himiiasy ónimderin shyǵaratyn 5 zaýyt jumys isteidi. Sońǵy 4 jylda óndirilgen ónim kólemi 4 esege ósip, 360 myń tonnany qurady. Onyń 80% eksporttaldy. Sonymen qatar, jumys istep turǵan zaýyttardyń 100% jobalyq qýatyna shyǵýy, 2021 jyly 3 zaýyttyń qurylysyn aiaqtaý josparlanǵan», - dep jazdy vitse-premer.
Onyń aitýynsha, 2025 jylǵa qarai áleýetti taǵy 2 jobany iske asyrý kózdelgen. Naqtyraq aitsaq, jylyna 430 myń tonna polietelentereftalat óndiretin jáne jylyna 130 myń tonna metanol óndiretin zaýyttar ashý josparlanyp otyr. Atlaǵan jobalar 2025 jylǵa qarai munai-gaz-himiia óndirisiniń kólemin 2 mln tonnaǵa deiin ulǵaitýǵa múmkindik beredi. Bul 2020 jylǵy kórsetkishtermen salystyrǵanda 5,5 ese artyq.
«Sondai-aq, josparlanǵan jobalardyń off-take kelisimsharttary bar ekenin atap ótken jón. Bul investorlardy tańdaý kezindegi kriteriilerdiń biri bolyp tabylady. Jalpy, Qazaqstanda shyǵarý josparlanǵan munai-gaz himiiasy ónimine turaqty álemdik suranys bar ekenin IHS, McKinsey jáne BCG siiaqty birneshe álemdik agenttik rastap otyr», - delingen jaýapta.
Sarapshylardyń boljamy boiynsha, 2030 jylǵa qarai polipropilenge suranys jylyna shamamen 100 mln tonnaǵa jetýi múmkin.
«Qoldanystaǵy jáne iske qosylatyn qýattardy eskere otyryp, álemdegi usynys jylyna 90 mln tonna bolady. Polietilenge álemdik suranys jylyna orta eseppen 4% ósip, jylyna 160 mln tonnaǵa jetedi. Álemdik suranystyń ósý draiveri Ońtústik Shyǵys Aziia elderi, onyń ishinde Qytai, Koreia, Japoniia bolady. Tek Qytaida ǵana polipropilen men polietilenge suranys 2037 jylǵa deiin 40 mln tonnaǵa artady», - dep túiindedi Roman Skliar.
