© AFP 2023 / TOBIAS SCHWARZ
Oqý-aǵartý ministri Ǵani Beisembaev balabaqshalar men mektepterge kadr daiarlaý úshin qandai sharalar qabyldanyp jatqanyn aitty, dep habarlaidy Sputnik Qazaqstan.
Ministrdiń aqparatynsha, qazir kolledjderde mektepke deiingi uiymdarǵa qajet 13 myń tárbieshi jáne 15 myńnan astam bastaýysh synyp muǵalimi daiarlanyp jatyr.
"Demografiialyq ahýalǵa bailanysty 2025 jylǵa qarai balabaqshalarǵa 15 myńnan astam tárbieshi, mektepterge 14 myńnan asa bastaýysh synyp muǵalimi qajet bolady. Osyny eskere otyryp, pedagog kadrlaryn daiarlaýǵa bólinetin memlekettik tapsyrys jyl saiyn ulǵaitylýda", - dedi Beisembaev Úkimet otyrysynda.
Aitýynsha, jańadan ashylatyn mektepke deiingi uiymdar men "Jaily mektep" jobasy aiasynda salynatyn bilim oshaqtaryna mamandar qajet bolady. Osyny eskere otyryp, barlyq óńir ákimdikteri, ásirese, Almaty, Astana jáne Shymkent qalalary men Almaty, Atyraý, Túrkistan oblystarynyń ákimdikteri memlekettik bilim berý tapsyrysyn óńirdegi qajettilikke qarai saralap, bólgeni jón.
Sondai-aq ministr kadrlardy daiarlaý sapasyn arttyrý jáne ádistemelik qamtamasyz etý maqsatynda "Pedagog" kásiptik standarty bekitilgenin aitty. Onyń negizinde bilim berý baǵdarlamalaryn ázirleý úshin ádistemelik usynymdar ázirlendi. 6 myńnan astam pedagog baǵdarlamalardy ázirleýdiń jańa tásilderi boiynsha biliktiliginin arttyrdy.
"Nátijesinde kolledjder jumys berýshilermen birlesip, "Pedagog" kásiptik standarty negizinde 554 baǵdarlamany jańartyp, iske asyrýda. Stýdentter balabaqshalar men mektepterde kásiptik praktikadan ótedi. Bitirýshi túlekter jumysqa ornalasar aldynda biliktiligin rastaý úshin mindetti túrde sertifikattaýdan ótip, sodan keiin ǵana konkýrsqa qatysa alady", - dep málimdedi vedomstvo basshysy.
Biyldan bastap Oqý-aǵartý ministrligi kolledjderge qoiylatyn biliktilik talaptaryn kúsheitken. Atap aitqanda, keminde 5 pedagogika mamandyǵy boiynsha litsenziianyń bolýyn jáne bitirýshilerdiń keminde 90%-in jumysqa ornalastyrýdy qamtamasyz etýge tiis.
Budan bólek, akademiialyq utqyrlyq, mamandyq boiynsha litsenziialaý, muǵalimderdi daiarlaýda qashyqtan oqytýdy shekteý máselesi zańnamalyq turǵyda bekitilip jatyr.
