2025 jylǵa qarai qosymsha shamamen 246 aýyldyq eldi mekenge gaz tartylady. Bul týraly búgin Úkimet otyrysynda QR Energetika ministri Nurlan Noǵaev aitty, dep habarlaidy QazAqparat.
«2021 jylǵy 1 qańtardaǵy jaǵdai boiynsha eldi mekenderdi gazdandyrý deńgeii 53,07 paiyzdy qurady Elimizdegi 6 162 eldi mekenniń 1 468-i gazdandyrylǵan, onyń ishinde 1 428-i - aýyldyq eldi mekender. Búgingi tańda elimizdiń 18 532 myń halyq sanynan 9 836 myń adam tabiǵi gazǵa qol jetkizdi. Onyń ishinde 4 mln adam - aýyldyq eldi meken turǵyndary. Gazdandyrý deńgeii 90 paiyzdan asatyn neǵurlym gazdandyrylǵan óńirler: Atyraý oblysy - 99,6, Mańǵystaý oblysy – 99, Almaty qalasy – 98,8, Batys Qazaqstan oblysy - 96,5, Shymkent qalasy - 92,1 jáne Aqtóbe oblysy - 90,1 paiyz», - dedi ministr.
Onyń aitýynsha, qazirgi ýaqytta respýblika óńirlerin odan ári gazdandyrý boiynsha jumystar júrgizilýde.
«Qoldanystaǵy jáne perspektivaly gazdandyrý jobalary boiynsha taldaý júrgize otyryp, aýyldyq eldi mekenderdi gazdandyrýdyń boljamdy jospary jasaldy. Oǵan sáikes 2025 jylǵa qarai qosymsha shamamen 246 aýyldyq eldi mekendi nemese 900 myń adamdy gazdandyrý kútilýde. Onyń ishinde: 2021 jyly 52 aýyldyq eldi meken nemese 389 myń adam, 2022 jyly – 49, 2023 jyly – 76, 2024 jyly - 31 jáne 2025 jyly - 43 aýyldyq eldi meken», - dedi Nurlan Noǵaev.
