2025 jylǵa qarai aýyldarda 24 mln sharshy metr turǵyn úi paidalanýǵa beriledi. Bul týraly Úkimet otyrysynda QR Premer-Ministri Asqar Mamin aitty, dep habarlaidy QazAqparati.
«Nur Otan» partiiasynyń «Ózgerister joly: árkimge laiyqty ómir!» baǵdarlamasyn oryndaý jónindegi jol kartasyn iske asyrý aiasynda bizge aýyldyq jerlerdegi ómir sapasyn arttyrý mindeti qoiylyp otyr. Aýyl turǵyndarynyń turmys sapasyn arttyrý úshin eń aldymen infraqurylymdy jańǵyrtý jumysy júrgizilýde. 2025 jylǵa deiin jergilikti mańyzy bar 27 myń shaqyrym jol salynyp, jóndeledi. Aýyldarda 24 mln sharshy metr turǵyn úi paidalanýǵa beriledi», - dedi Úkimet basshysy.
Onyń atap ótýinshe, agroónerkásipti keshen salasynda 845 joba iske asyrylyp, 500 myń jumys orny qurylady. 7 ekojúie qurylyp, 350 myń fermer men úi qojalyqtary tartylady.
«Qabyldanatyn sharalar aýyl turǵynynyń tabysyn arttyrýǵa múmkindik beredi. Aýyl turǵyndarynyń 100 paiyzy sapaly aýyz sýmen jáne 60 paiyzy tabiǵi gazben qamtamasyz etiledi. Densaýlyq saqtaý salasynda bes jyl ishinde 1 095 nysan jóndeýden ótkiziledi jáne salynady. Bul halyqty meditsinalyq qyzmet kórsetýmen qamtýdy 2 ese ulǵaitýǵa múmkindik beredi. 5 jyl ishinde 5 myń mektep jańǵyrtylyp, 315 aýyl mektebi salynady», - dedi Asqar Mamin.
Premer-Ministr aýyl oqýshylaryn qosymsha bilimmen barynsha qamtý jáne bilim sapasynyń qala men aýyl arasyndaǵy aiyrmasyn qysqartý jumysy júrgizilip jatqanyn aitty.
«748 mádeniet men 1 719 sport nysany jóndeledi jáne salynady. Jalpy, aýyldyq eldi mekenderdi damytý boiynsha 5 jylǵa arnalǵan naqty jospar ázirlengen. 2021 jyldyń ózinde «Aýyl el besigi» jobasyn júzege asyrý aiasynda 105 mlrd teńge bólindi, ol 1,3 mln adam turatyn 480 aýyldy jańǵyrtýǵa múmkindik beredi. Bes jyldyń ishinde 800 mlrd teńge bólinedi. Jol, injenerlik jáne áleýmettik infraqurylym jaqsartylady. Bul 7 mln aýyl turǵyndarynyń ómir sapasyn jaqsartýǵa múmkindik jasaidy. Bul jospardyń iske asyrýdaǵy basty maqsat – ár aýyl turǵynynyń ómir sapasynyń jaqsartý», - dedi Úkimet basshysy
