QR Premer-Ministri A. Maminniń tóraǵalyǵymen ótken Úkimet otyrysynda «Nurly jer» baǵdarlamasyn iske asyrý barysy qaraldy, dep habarlaidy "Ult aqparat".
QR indýstriia jáne infraqurylymdyq damý ministri Roman Skliar osy jyly 6 ai ishinde turǵyn úi qurylysyna 605,7 mlrd teńge investitsiia tartylǵanyn, bul 2018 jylǵy deńgeiden 15,5%-ǵa joǵary ekenin aitty. 1 teńge memlekettik qarajatqa 7,4 teńge jeke investitsiia tartyldy.
«Osy jyldyń sońyna deiin 118 myń turǵyn úi salýdy josparladyq. Jarty jyldyq qorytyndy boiynsha 48 925 turǵyn úi berildi. Turǵyn úidi ýaqytyly berý úshin qurylys alańdaryna injenerlik kommýnikatsiia júrgizýge 81,7 mlrd teńge qarastyrylǵan», — dedi R. Skliar.
Jarty jyldyq qorytyndy negizinde qarjylandyrý jospary boiynsha óńirlerge 36,8 mlrd teńge aýdaryldy, onyń 35,8 mlrd teńgesi nemese 96,1% igerildi.
«JAO-da kezekte turǵandar úshin satyp almai jalǵa beriletin turǵyn úi salýǵa jáne satyp alýǵa 32,8 mlrd teńge kózdelgen. Óńirlerge 14,9 mlrd teńge aýdaryldy, 14,8 mlrd teńge nemese 99% igerildi. Biyl kezekte turǵandar úshin 6 myń páterdi paidalanýǵa berý josparlanýda. 1 shildede 924 páter berildi», — dedi indýstriia jáne infraqurylymdyq damý ministri.
Kóp balaly otbasylar úshin jalǵa beriletin turǵyn úi salýǵa jáne satyp alýǵa 50 mlrd teńge qarastyryldy. Qarjylandyrý jospary boiynsha óńirlerge 9,7 mlrd teńge aýdaryldy, onyń 9,6 mlrd teńgesi nemese 99,6% igerildi. Barlyq kózderden 7482 páter berý josparlanýda. Mamyr aiynan bastap 1619 kópbalaly otbasyna turǵyn úi berildi.
Sonymen qatar, R. Skliar jumys isteitin jastardyń eńbek utqyrlyǵyn qamtamasyz etý úshin Nur-Sultan, Almaty jáne Shymkent qalalarynda 2019-2021 jyldary jylyna 1 myń jaldamaly páter salý josparlanǵanyn atap ótti.
«Bul 2019, 2020 jáne 2021 jyldary jumysshy jastarǵa 3 myń jalǵa beriletin páter berýge múmkindik beredi», — dep naqtylady ministr.
Az qamtamasyz etilgen otbasylardy jyldyq 2%-ben jeńildikpen nesielendirý aiasynda Turǵyn úi qurylys jinaq bankine 50 mlrd teńge bólindi. Óńirler arasyndaǵy nesie berý limitteri kezektegiler sanyna bara-bar anyqtalǵan.
15 shildede bank tólem qabilettiligin aldyn ala baǵalaý boiynsha kezekte turǵandardan ótinish qabyldaýdy bastady. Qaraýǵa 9,9 mlrd teńge somasyna 920 ótinish tústi. Nesie berýge 1 mlrd teńgege 91 ótinim maquldandy.
«2019 jyly shamamen 13 mln sharshy metr turǵyn úi salý josparlanǵan. Bul ótken jylǵy kórsetkishten 500 myń sharshy metrge artyq. Sonymen qatar, turǵyn úi baǵdarlamasynyń negizgi mindetteriniń biri áleýmettik baǵytqa negizdelgen. Jyl saiyn 6 myń az qamtylǵan otbasy men 3 myń jumys isteitin jastardy baspanamen qamtamasyz etý mindettemesin aldyq. Mamyrdan bastap ony iske asyrýǵa kiristik. Barlyq zańnamalyq normalar qabyldanyp, qajetti qarajat bólindi», - dedi Asqar Mamin Úkimet otyrysynda.
Osy oraida Úkimet basshysy áleýmettik baǵyttaǵy turǵyn úi kólemin tolyǵymen berý jáne satyp alý boiynsha naqty sharalardy qabyldaý kerektigin tapsyrdy.
Budan bólek, Premer-Ministr turǵyn úidi salýǵa, injenerlik infraqurylymdy jetkizýge ýaqtyly daiyndalýdyń mańyzy zor ekenin atap ótti.
«Memleket basshysy barlyq turǵyn úi baǵdarlamalaryn birtutas turǵyn úi saiasatyna biriktirýdi tapsyrdy. Sondyqtan biyl 2025 jylǵa deiingi jańa «Nurly jer» memlekettik baǵdarlamasy qabyldanady, onyń aiasynda 650 myńǵa jýyq otbasy nemese 2 millionnan astam adam jańa turǵyn úimen qamtamasyz etiledi», - dedi Asqar Mamin.
Osy oraida Indýstriia jáne infraqurylymdyq damý ministrligine múddeli memorgandarmen jáne uiymdarmen birlesip, qyrkúiekte tiisti qaýly jobasyn Úkimetke engizýdi júktedi.
