2025 jylǵa deiin elimizde 103 mln sharshy metr baspana salynady. Bul týraly búgin Úkimet otyrysynda QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Qurylys materialdary óndirisinde naqty kólem indeksi 106 paiyz deńgeiinde josparlanǵan. Biyl saladaǵy ósim temir-beton buiymdary óndirisiniń 16, kirpishter 15, tsement 11, qurylys eritindileri 13, jylý oqshaýlaǵysh materialdar 12,5, gipsokarton 11 paiyz artýy esebinen qamtamasyz etiledi», - dedi óńdeý ónerkásibin damytý jaiynda baiandaǵan ministr.
Osy rette Beibit Atamqulov Memleket basshysy osy jyldyń qańtar aiynda Úkimettiń keńeitilgen otyrysynda turǵyn úi qurylysynda jergilikti qamtý úlesin arttyrýdy tapsyrǵanyn atap ótti.
«2025 jylǵa deiin elimizde 103 mln sharshy metr baspana salynady. Bul biznes úshin qurylys materialdarynyń otandyq naryǵyn damytýǵa qosymsha múmkindik beredi. Saladaǵy qajettilikti anyqtaý maqsatynda negizgi 24 pozitsiia boiynsha qurylys materialdary naryǵyna taldaý júrgizdik. Búgingi tańda otandyq óndirýshiler 10 taýar pozitsiiasy boiynsha ishki naryqtyń qajettiligin tolyǵymen qamtamasyz etedi», - dedi ol.
Onyń atap ótýinshe, 11 pozitsiia boiynsha jumys istep turǵan kásiporyndar shamamen 50 paiyzdy qamtamasyz etip otyr. Al linoleým, túsqaǵaz, sanfaians siiaqty 3 pozitsiia boiynsha qazirgi ýaqytta ishki naryqta óndiris joq.
«Ishki naryqty otandyq qurylys materialdarymen tolyq qamtý maqsatynda biz qazir shet elderdiń transulttyq kompaniialarmen Qazaqstan aýmaǵynda import almastyratyn óndiris ashý máselesin pysyqtap jatyrmyz. Ulttyq kásipkerler palatasymen jáne «Samuryq-Qazyna qorymen» birlesip, Qurylys indýstriiasyn damytýdyń 2025 jylǵa deiingi jol kartasyn ázirledik. Onda salany qoldaýdyń barlyq tetikteri qarastyrylǵan», - dedi Beibit Atamqulov.
