2025 jylǵa deiin elimizde 11 myń shaqyrym jol aqyly bolady. Bul týraly búgin «QazAvtoJol» UK» AQ basqarma tóraǵasy Ulan Álipov aitty, dep habarlaidy QazAqparat.
«Qazirgi ýaqytta bizde 680 shaqyrym aqyly joldar bar. Olar Nur-Sultan-Shýche, Nur-Sultan-Temirtaý, Almaty-Qapshaǵai, Almaty-Qorǵas joldary. Ótken jyly biz investitsiialyq baiqaý ótkizdik. Ony taivandarmen birge «Computer vision technologies» kompaniiasy jeńip aldy. Olar 2020 jyldan 2025 jylǵa deiin 11 myń shaqyrym jolda aqy alý júiesin engizedi. Bul joldar qazirgidei gibridti emes, ashyq bolady. Kameralar qansha mashina ótkenin, qansha shaqyrym júrgenin túsirip alyp, habarlama jiberedi. Josparly quny jeńil kólikterge 1 shaqyrym úshin 1 teńge, júk kólikterine 15 teńge», - dedi ol Sybailas jemqorlyqqa qarsy qyzmet alańynda ótken selektorlyq keńeste.
Sonymen qatar ol jol salý salasyndaǵy jemqorlyqty joiýǵa baǵyttalǵan jumystar týraly da aityp berdi.
«Merdiger 1 aidyń ishinde oryndaýy tiis jumys kólemi bar. Eger ol belgilengen merzimde jumysty istemese, onda oǵan aiyppul eseptelinedi. Osy oraida jemqorlyq táýekeli týyndaidy. Iaǵni, ol aiyppul tóleýden jaltarý úshin oryndalmaǵan jumystarǵa tolyq kólemde qol qoidyrýǵa tyrysady. Sondyqtan aiyppuldy alyp tastap otyrmyz. Alǵashqy aiynda kólemnń oryndalmaǵany týraly eskertpe beremiz. Ekinshi aiynda da eskertemiz. Eger ol úshinshi aida da jospardy oryndamasa, demek ol oryndai almaidy degen sóz. Sebebi maýsym da, ýaqyt ta qysqa. Odan ary sozýdyń esh máni joq. Sondyqtan úshinshi aida biz oǵan aiyppul salyp, kelisimshartty buzamyz. Bul merzimge ǵana emes, sonymen birge sapaǵa da qatysty», - dedi Ulan Álipov.
