Bilim berýdi jáne ǵylymdy damytýdyń 2025 jylǵa deiingi memlekettik baǵdarlamasy boiynsha júzege asyrylatyn reformalardy qaita zerdeleý qajet. Bul týraly Ulttyq qoǵamdyq senim keńesiniń 3-otyrysynda QR Prezidenti Qasym-Jomart Toqaev aitty, dep habarlaidy QazAqparat.
«Ulttyq keńes 1 jylǵa jýyq ýaqyt aralyǵynda asa mańyzdy ári aýqymdy reformalardy pysyqtap, júzege asyrdy. Qoǵamdyq dialogtyń ulttyq modeli óz tiimdiligin kórsetti. Qazir aldaǵy kezeńniń kúntártibin anyqtap alýymyz qajet. Kez kelgen memleket úshin adami kapital basty ólshemge ainaldy. Osy oraida biliktilik máselesi airyqsha mańyzǵa ie bolyp otyr. Ár azamat óziniń jeke jetistigi arqyly búkil eldiń tabysty bolýyna, ósip-órkendeýine úles qosady. Sondyqtan búgingi otyrysty adami kapitaldyń negizgi baǵyttaryn damytý máselesine arnadyq. Bul bilim berý, ǵylym jáne densaýlyq salasy», - dedi Memleket basshysy.
QR Prezidenti jańa ahýal bilim berý jáne ǵylym júiesin túbegeili reformalaýdy talap etip otyrǵandyǵyn basa aitty.
«Endi bul salanyń mańyzy arta túsetini anyq. Tipti ekonomikanyń ózi soǵan táýeldi bolmaq. Biz bilim men ǵylym salasynyń bolashaqtaǵy rólin aiqyn túsinýimiz kerek. Búkil memlekettik saiasatty soǵan sáikes júzege asyramyz. Bilim berýdi jáne ǵylymdy damytýdyń 2025 jylǵa deiingi memlekettik baǵdarlamasy boiynsha júzege asyrylatyn reformalardy qaita zerdeleý qajet. 2025 jylǵa deiin bilim salasyna bólinetin qarajat 6 ese, ǵylymǵa bólinetin qarjy 7 ese ósetinin eskergen jón», - dedi Qasym-Jomart Toqaev.
