QR Premer-Ministri Asqar Maminniń tóraǵalyǵymen ótken Úkimet otyrysynda QR Prezidenti Qasym-Jomart Toqaevtyń «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýyn iske asyrý jónindegi sharalar qaraldy. Olardy júzege asyrýdyń negizgi tetikteri týraly QR indýstriia jáne infraqurylymdyq damý ministri Beibit Atamqulov baiandady, dep jazady primeminister.kz saity.
Ministrdiń habarlaýynsha, búgingi tańda «Ónerkásiptik saiasat týraly» Zań jobasy tujyrymdamasynyń jobasy ázirlenýde. Jobany salalyq qaýymdastyqtar, ónerkásiptik kásiporyndar jáne múddeli memlekettik organdar talqylap jatyr.
Zań jobasynda qoldaý sharalaryn keńeitý, memlekettik, kvazimemlekettik sektorlar men jer qoinaýyn paidalanýshylar tarapynan kepildi satyp alýdy júzege asyrý sharalary kózdelgen.
Tujyrymdama jyl sońyna deiin qabyldanady.
Ministrlik retteletin satyp alýlardaǵy jergilikti qamtýdy damytýǵa jáne memlekettik organdar, ulttyq kompaniialar men holdingterdiń birinshi basshylary men orynbasarlarynyń jaýapkershiligin kúsheitýge baǵyttalǵan normativtik quqyqtyq aktilerge ózgerister toptamasyn ázirleidi.
Qara jáne tústi metallýrgiianyń, avtomobil jáne mashina jasaýdyń jańa bólinisterin damytý boiynsha usynystar ázirleýde otandyq shikizatty qaita óńdeýdi tereńdetý jumystary ári qarai júrgiziledi. Áleýet $35 mlrd asady.
Metallýrgiia ónerkásibinde otandyq shikizat negizinde joǵary bólinisti ónimder óndirisin damytýǵa basa nazar aýdarylady.
Otandyq kásiporyndardy tiimdi baǵalarmen qajetti kólemde qamtamasyz etý tetigin ázirlei otyryp, shikizatqa jyl saiynǵy qajettilikti qalyptastyrý josparlanyp otyr.
Atamqulov atap ótkendei, kezekte turǵan azamattardyń baspana máselesin tezirek sheshý úshin «Nurly jer» baǵdarlamasynda jeke turǵyn úi qorynan jaldaý aqysyn sýbsidiialaý tetigin qarastyrý usynylady. Bul úshin «Nurly jer» baǵdarlamasy aiasynda jaldamaly turǵyn úi qurylysyna qarastyrylǵan qarajatty qaita baǵyttaý usynylady. Shamamen 100 myń azamatqa qoldaý kórsetiledi. Atalǵan tetik «Otbasy banki» arqyly júzege asyrylady.
Sonymen qatar jeke qurylys salýdy yntalandyrý úshin «Nurly jer» baǵdarlamasy aiasynda azamattarǵa jeke qurylys salýǵa bólinetin 40 myń jer ýchaskesine kommýnikatsiialar tartylady.
Elimizde 6,3 myń aýyl bolsa, sonyń 3,5 myńy perspektivalyq sanalady.
«Nurly jer» baǵdarlamasy aiasynda óz qarajatyna tiptik jobamen baspana turǵyzatyn aýyldardaǵy jumys berýshiniń shyǵyndaryn sýbsidiialaý tetigi ázirlenedi. Ministrlik úidiń belgilengen qunynyń bir bóligin sýbsidiialaý tetigin ázirleidi», — dedi vedomstvo basshysy.
Turǵyn úi-kommýnaldyq sharýashylyq máseleleri boiynsha qabyldanǵan Zań aiasynda múlik ieleriniń birlestigi institýty engiziledi. Barlyq qajetti normativtik-quqyqtyq aktiler qabyldanǵan. Qazirgi ýaqytta turǵyn úi ieleri múlik ieleriniń birlestikterin qurý jáne tirkeý boiynsha tiisti jumystardy jasap jatyr.
Qazaqstannyń tranzittik kóshbasshylyǵyn nyǵaitý maqsatynda «Nurly jol» baǵdarlamasy aiasynda tranzittik servis sapasyn jáne jyldamdyqty arttyrý úshin elimiz arqyly ótetin temirjol tranziti dáliziniń infraqurylymyn ári qarai damytý, sondai-aq osal tustaryn joiý kózdelgen.
«2020 jylǵa deiin respýblikalyq jelidegi avtojoldardyń 13 myń shaqyrymy qaita jańǵyrtyldy. “Nurly jol” baǵdarlamasy aiasynda 11 myń shaqyrym jol salynady jáne qaita jańǵyrtylady. Onyń ishinde respýblikalyq jelidegi 4 myń shaqyrym jolda biyl jumystar júrgizilip jatyr. Osylaisha, 2025 jylǵa deiin respýblikalyq jelidegi avtojoldardyń barlyǵynyń jaǵdaiy jaqsarady», — dedi ministr.
2025 jylǵa deiin uzyndyǵy 24 myń shaqyrymdy quraityn respýblikalyq jelidegi avtojoldar boiyndaǵy qyzmet kórsetetin obektiler halyqaralyq standarttarǵa sai bolady. Bul jumys jergilikti atqarýshy organdarymen jáne biznes ókilderimen birge júrgiziledi.
