Qazaqstan velosiped sport federatsiiasy maýsym qorytyndysyn jasap, jyldyń basty jetistikterin, júzege asqan jobalardy jáne 2026 jylǵa josparlanǵan damý baǵyttaryn tanystyrdy. Saltanatty is-shara sportshylardy, jattyqtyrýshylardy, memlekettik organdar men Federatsiia seriktesterin biriktirdi.
2025 jyly Federatsiia aitarlyqtai aýqymdy jumys atqaryp, el ishinde de, halyqaralyq arenada da joǵary nátijeler kórsetti. Qazaqstandyq velosportshylar iri halyqaralyq jarystarda barlyǵy 36 medal jeńip aldy: 14 altyn, 12 kúmis jáne 10 qola. Malaiziia men Tailandta ótken Aziia chempionattarynda trek, shosse jáne para-velosport baǵytyndaǵy ulttyq quramalar birneshe márte júldegerler qatarynan kórinip, Qazaqstannyń aimaqtaǵy pozitsiiasyn nyǵaitty.
Jarqyn jetistikterdiń biri – Bahreinde ótken jasóspirimder arasyndaǵy III Aziia oiyndary. Qazaqstannyń jas sportshylary bul jarysta 2 altyn jáne 1 kúmis medal enshiledi.
Qazaqstan velosiped sporty federatsiiasynyń prezidenti, «Atameken» QR UKP Tóralqa tóraǵasy Raiymbek Batalov 2025 jyldy sońǵy ýaqyttardaǵy eń tabysty maýsymdardyń biri bolǵanyn atap ótti.
«Bul jetistikter Qazaqstanda bolashaq chempiondardyń myqty býyny qalyptasyp kele jatqanyn dáleldeidi.
Maýntinbaik, trek jáne shosse baǵyttarynda jyl boiy elimizdiń ár óńirinde 20 ulttyq chempionat pen kýbok jarystary ótti. Shymkent, Qostanai, Taraz, Semei, Astana jáne Qonaev qalalarynda ótken jarystar ishki kúntizbeniń geografiiasyn keńeitip, qatysýshylar sanyn edáýir arttyrdy. Bul — qazaqstandyq velosport tarihyndaǵy eń qarqyndy jáne mazmundy maýsymdardyń biri. Sportshylarymyz halyqaralyq arenada da jarqyn ári senimdi nátijeler kórsetti», - dedi Raitbek Batalov.
Federatsiia biyl da aýyldyq jerlerdegi sport mektepterin qoldaý baǵdarlamasyn jalǵastyrdy. Oǵan sáikes ondaǵan balalar men jasóspirimder sport mekemeleri jańa velosiped bólshekterimen, sporttyq formamen jáne oqý-jattyǵý protsesine qajetti tehnikalyq jabdyqtarmen tolyqty. Bul bastama aýyl balalaryna velosportqa teń qoljetimdilik berip, jańa talanttardy anyqtaýǵa jáne eldiń sporttyq infraqurylymyn nyǵaitýǵa serpin berdi.
Atqarylǵan jumysqa Týrizm jáne sport vitse-ministri Serik Jarasbaev ta joǵary baǵasyn berdi.
«Qazirgi tańda qazaqstandyq velosport serpindi damýdyń jańa kezeńinde tur. Prezident Úkimetke barlyq jaǵdai jasap, salany qoldaýdy kúsheitýdi tapsyrdy. Onyń naqty nátijesin búginde kórip otyrmyz. Aldymyzda úlken mindetter bar: kelesi jyly Aziia oiyndary, odan keiin Olimpiadaǵa daiyndyq. Eger kúsh-jigerimizdi biriktirip, júieli daiyndyqty jalǵastyrsaq, joǵary nátijelerge qol jetkize alatynymyzǵa senimdimin. Ministrlik tarapynan jan-jaqty qoldaý kórsetýge daiynbyz», - dedi ol.
Saltanatty is-sharanyń mańyzdy sátteriniń biri - «Altyn dóńgelek» atty jyl saiynǵy simvolikalyq marapatty «Jasóspirimder» sanatyndaǵy jyldyń úzdik sportshysyna tabystaý boldy. Biylǵy júldeniń iegeri – 2009 jyly týǵan, Almaty qalasynyń ókili, Qazaqstannyń birneshe dúrkin chempiony Gleb Novikov.
«Men velosportqa kezdeisoq keldim. Aýlada velosiped teýip júrgende, bolashaq bapkerimniń jubaiy baiqap qalyp, sektsiiaǵa baryp kórýdi usyndy. Sodan beri osy sportpen ainalysyp kelemin. Qazir men — shosse jarysy boiynsha Qazaqstannyń úsh dúrkin chempionymyn, maýntinbaik boiynsha eldiń eki dúrkin chempionymyn. Velosportsyz ómirimdi elestete almaimyn. Bolashaqta Olimpiada chempiony bolýdy armandaimyn», — dedi Gleb Novikov.
Basqosý barysynda áielder komandasy UAE Team ADQ-men yntymaqtastyq týraly kelisimge qol qoiylýy erekshe nazarǵa ie boldy. Bul bastama Qazaqstandaǵy áielder velosportynyń jańa kezeńin ashyp, sportshylarǵa halyqaralyq deńgeide daiyndalýǵa, birlesken jattyǵý baǵdarlamalaryna qatysýǵa jáne álemniń úzdik veloshabandozdarymen tájiribe almasýǵa múmkindik beredi. Sondai-aq, bul seriktestik 2026 jyly Japoniiada ótetin Aziia oiyndaryna daiyndyqty kúsheitedi.
«Qazaqstanda áielder velosportynyń damýyna úles qosý – men úshin úlken qýanysh. Búgin biz bolashaqtaǵy jeńisterge jol ashyp jatyrmyz: bul júieli jumys, jańa halyqaralyq múmkindikter jáne talantty sportshylardy qoldaý. Alda jaqsy nátije men úlken jetistikter kútedi dep senemin», — BAÁ ADQ UCI WT Áielder velokomandasynyń bas direktory Iana Zel.
Is-sharanyń eń erekshe kezeńi — velosportqa alǵash qadam jasap júrgen eń kishkentai sportshylardy marapattaý rásimi boldy. Bul dástúr balalardy erte jastan sportqa baýlýdyń, belsendi ómir saltyna qyzyǵýshylyq qalyptastyrýdyń mańyzyn kórsetedi.
Sonymen qatar jasóspirimder arasyndaǵy III Aziia oiyndarynyń chempiondary da marapattalyp, olardyń jeńisteri elimizdiń daiyndyq júiesiniń tiimdiligin jáne Qazaqstannyń halyqaralyq sporttyq bedelin kúsheite tústi.
Saltanatty keshtiń qorytyndy bóliminde ELITE sanatyndaǵy úzdik sportshylar — shosse, trek, MTB, BMX jáne paravelosport baǵyttary boiynsha marapattaldy. Olardyń halyqaralyq arenadaǵy jetistikteri Qazaqstandy qýatty jáne bolashaǵy zor velosport eli retinde tanytýǵa zor úles qosty.
