Áleýmettik jeliler endi tek sýret pen video jariialaityn alań emes. Olar búginde teledidardyń ornyn basyp, álemniń túkpir-túkpirindegi shyǵarmashyl jandardyń jańalyqtyń jarshysy ári trendterdiń bastamashysy bolýyna múmkindik berip otyr.
2024 jyly qazaqstandyq aýditoriia áleýmettik jelilerdegi tanymal videolar arqyly qoǵamdaǵy máselelerdi kóterip, kóńildi sátterin bólisti. Olar sheteldik trendterge erip, Dýbai shokoladynan dám tatty, koreialyq júzimdi talasyp satyp aldy. ULT.kz osy jyldyń eń jarqyn trendterin eske túsirdi.
Zorlyqqa qarsy ún qatqan bikeshter
Qýandyq Bishimbaevtyń atyshýly soty áleýmettik jelide keńinen talqylandy. Bul oqiǵa turmystyq zorlyq-zombylyq taqyryby qoǵamda áli ózekti ekenin kórsetti.
Oqi otyryńyz: Qýandyq Bishimbaevtyń shyn máninde qaida ekeni belgili boldy
Paidalanýshylar otbasylyq qiyndyqtar men óz ómirindegi ózgeristerdi beinelep, jeke tájiribelerin bólisti. Osy ýaqytta Diana Ismaildiń «Kezdeser» áni trendke ainalyp, zorlyq kórgen áielderdiń jańa ómirge degen úmitin áýezdi ánmen árledi.
Qaltany qaqqan Dýbai shokolady
Jazda TikTok qoldanýshylary Dýbaidyń áigili shokoladyna erekshe qyzyǵýshylyq tanytty. Piste pastasy men kadaif kespesinen daiyndalǵan tátti ónim kóptiń nazaryn aýdaryp, dámin kórýge degen qumarlyq týdyrdy. Qazaqstandyqtar shokoladtyń baǵasy qymbat bolǵanyna qaramastan, trendten qalys qalmady. Búginde onyń balamasyn jergilikti konditerler de jasap, naryqqa usynýda.
«Shain mýskat» júzimi – qysqa merzimdi trend
Shokolad trendi sál báseńdegende, onyń ornyn «shain mýskat» júzimi basty. Bul erekshe iri ári súieksiz júzimdi kamera aldynda qytyrlata jep, paidalanýshylar óz reaktsiialaryn bólisip jatty. Bastapqyda baǵasy 6000 teńgege deiin jetken bul ónim trendten túsken soń, 2000-3000 teńge aralyǵyna deiin arzandady. Degenmen, bul júzim turaqty súiikti jemisterdiń qataryna kire qoiǵan joq.
Úndi qalyńdyǵy stilindegi qyzdar
Qazaqstandyq arýlar TikTok-taǵy «Asoka» trendinen shet qalǵan joq. Úndi qalyńdyǵy stilinde kiinip, erekshe makiiaj jasaý ońai kóringenimen, montaj sheberligi pen shyǵarmashylyqty talap etti. Bul trendke qatysqan árbir qyz ózindik biregeilik qosyp, aýditoriiasyn tańǵaldyrýǵa tyrysty. Olardyń ishinde Aisholpan Baitúgeldiń qysqa videosy kóp qaralym jinap, jyly pikirlerge ie boldy.
Muńaimaǵan ádemiler
Kúzde TikTok-ty qyrǵyz áni «Munaiba ademi» jaýlap aldy. 1995 jyly jaryq kórgen qazaqtyń «Úrbibi» áni qazaqsha emes, qyrǵyzsha trendke ainalyp, búkil álemdi jaýlap aldy. Elera Kabyljanqyzynyń oryndaýyndaǵy án álemniń túkpir-túkpirindegi adamdardy toptastyryp, dostyq pen týystyqtyń nyshanyna ainaldy.
Táttige toiǵan muǵalimder
Qysta oqýshylar óz muǵalimderi men synyp jetekshilerin tátti shokolad syilap, qýantýy trendke ainaldy. Ereje boiynsha muǵalim kózin jumyp, qolyn jaiyp otyrady, al oqýshylar ózderi alyp kelgen shokoladtaryn muǵalimniń alaqanyna qoiady. Keibir ustazdar bul trendke ázilmen qarap: «Kúnde ádemi bolyp kiinip baramyn, shokolad berip qala ma dep», kóńildi videolar túsirdi. Trend ýaqyt óte tek muǵalimderdi ǵana emes, mekteptiń tehqyzmetkerleri, kúzetshileri men basqa da qyzmetkerlerin qamtydy.
"Únsiz qalýǵa haqylaryń joq"
Sondai-aq jýyrda qazaqstandyqtar blogerlerden jappai "otpiska" jasaý trendin bastaǵan bolatyn. Qarapaiym áleýmettik jeli qoldanýshylary media tulǵalardyń elde bolyp jatqan oqiǵalarǵa árdaiym únsiz qalatynyna shaǵymdandy.
Oqi otyryńyz: Sherzat isi: Jeli qoldanýshylar jappai blogerlerden "otpiska" jasap jatyr
Atap aitqanda, 4 qazan kúni dúken mańynda qatygezdikpen óltirilgen Sherzat Polat isine qatysty blogerlerdiń ún qatpaýy adamdardyń ashýyna tidi. Jappai narazylyq saldarynan aktrisa, bloger Aqerke Arystyń Instagram paraqshasy tipti birneshe kún blokqa túsip qalǵan bolatyn.
Anara Baýyrjanqyzy
