2024 jylǵa qarai Qazaqstan gaz eksportyn toqtatýy múmkin. Bul jóninde QR Energetika ministri Bolat Aqsholaqov ortalyq kommýnikatsiialar qyzmetinde ótken brifingide málim etti, dep habarlaidy QazAqparat.
Brifing barysynda ministrge Resei gazyn Soltsútik pen Shyǵysqa tartý jobasy týraly saýal qoiyldy.
«Soltústik pen Shyǵysty gazdandyrýdyń eki joly bar. Birinshisi – Reseiden gaz tartý. Ekinshisi – tómennen keletin «Saryarqa» gaz qubyryn jalǵastyryp áketý. Reseiden gaz tartý arzanyraq bolatyn shyǵar. Irkilissiz jetkizý turǵysynan senimdirek te bolady. Óitkeni Resei Federatsiiasynda gaz qory óte mol. Bizge qajet gazdyń mólsheri olar úshin eleýsiz deýge bolady. Jylyna 4-7 mlrd tekshe metr gaz degen olarǵa buiym da emes. Ózimizdiń gazdy tartý qymbat dep otyrǵanym, eldiń jarty aýmaǵyna salalanǵan magistral ornatý kerek bolady. Ol magistraldiń boiynda gaz tutynatyn halyqtyń sany da shekteýli. Mysaly, Qostanaidan Petropavlǵa, Pavlodardan Óskemenge qubyr tartsaq, árqaisysyna jeke torap salý kerek. Bir qubyrmen másele shelie salmaidy», - dedi vedomstvo basshysy.
Bolat Aqsholaqov eldegi gaz qory ózimizge jetpeitindei zaman kele jatqanyn aitady.
«Onyń ústine qazirdiń ózinde bizde gaz tutyný kólemi úlken. Gazdandyrylǵan óńirlerdiń ózinde suranys joǵary. Ónerkásip pen elektr energetikasynyń kásiporyndary jáne bar. Osynyń bári 2024 jylǵa qarai bizde gaz eksporty bolmaityndai jaǵdaiǵa ákeletin shyǵar. Óitkeni bar gazdy óz ishimizde tutynatyn bolamyz. Iaǵni, qosymsha gaz qajet bolady. Ony ne Resei Federatsiiasynan, ne Túrkimenstan siiaqty ońtústiktegi kórshilerimizden ákelý kerek bolady. Túrkimenstan eldiń soltústiginen alys jatqandyqtan Resei tiimdi. Sondyqtan Soltústik pen Shyǵysty gazdandyrýdyń alǵashqy kezeńin Resei gazynyń esebinen tyndyrsaq, onda turǵan qorqynyshty eshteńe joq siiaqty. Keiin sol mólsherdegi gaz qory tabylyp jasta, ári qarai oilastyramyz», - dedi ministr.
Sondai-aq ol Reseimen gaz almasý tájiribesi burynnan bar ekenin eske saldy.
«Biz Reseimen swap tásili arqyly onsyz da gaz almasyp otyrmyz. Ońtústikke birneshe jyldan beri osy tásilmen gaz jetkizip kelemiz. Eshqandai táýekel bolǵan joq. Sondyqtan teoriialyq turǵyda yqtimal dúnieniń bárine alańdai berý durys emes dep oilaimyn», - dedi Bolat Aqsholaqov.
