Foto: elements.envato.com
Memlekettik bilim granty iegerleriniń esimderi belgili boldy, dep habarlaidy "Ult aqparat".
"QR Ǵylym jáne joǵary bilim ministrliginiń resmi saitynda jáne áleýmettik jelilerinde 2023-2024 oqý jylyna arnalǵan bilim granty iegerleriniń tizimi jariialandy.
Granttardy taǵaiyndaý konkýrsyna qatysý úshin 94 myń talapker qujat tapsyrdy. Bul ótken jylmen salystyrǵanda 14 myńǵa artyq.
Memlekettik granttar respýblikalyq komissiia otyrysynyń qorytyndysy boiynsha taǵaiyndaldy. Komissiia quramynda QR Parlamentiniń depýtattary, múddeli memlekettik organdardyń, bilim salasy kásipodaqtarynyń, QR Ulttyq kásipkerler palatasynyń, QR Joǵary oqý oryndarynyń assotsiatsiiasynyń jáne qoǵamdyq uiymdardyń ókilderi boldy" - delingen vedomstvo habarlamasynda.
Atap ótsek, biyl Memleket basshysy Qasym-Jomart Toqaevtyń tapsyrmasyna sáikes, halyq tyǵyz qonystanǵan batys jáne jańadan qurylǵan óńirlerdiń jastary úshin granttar bólingen. Pedagogikalyq, injenerlik, IT mamandyqtarǵa jáne jaratylystaný ǵylymdary boiynsha Atyraý oblysyna – 1500, Mańǵystaý oblysyna – 1500, Ulytaý oblysyna – 300, Jetisý oblysyna – 300, Abai oblysyna – 500, Shymkent qalasyna – 400, Túrkistan oblysyna 500 grant berilgen.
"Bir granttyq orynǵa eń úlken konkýrs «Stomatologiia» BBBT boiynsha boldy. Bul mamandyq boiynsha 22 talapker bir orynǵa talasty. Ary qarai «Halyqaralyq qatynastar jáne diplomatiia» (14 adam), Quqyq (11 adam), «Mýzyka muǵalimderin daiarlaý», «Dene shynyqtyrý muǵalimderin daiarlaý» jáne «Psihologiia» (10 adamnan) boldy.
Grantqa úmitkerler arasynda balalar teńdigi jaǵdaiynda basym quqyqqa ie bolatyn 20 myńǵa jýyq talapker, olardyń ishinde «Altyn belgi» iegerleri, halyqaralyq jáne respýblikalyq olimpiadalardyń jeńimpazdary, oqý úzdikteri bar. Sondai-aq, granttardy úilestirý barysynda áleýmettik osal sanattaǵy balalardyń kvotalary eskerildi" - delingen habarlamada.
Aita keteiik, joǵary oqý oryndaryna qujattardy tapsyrý 25 tamyzǵa deiin júzege asyrylady.
