QR Ulttyq ekonomika ministri Áset Erǵaliev Qazaqstannyń 2025 jylǵa deiingi damýdyń ulttyq josparyndaǵy jalpyulttyq basymdyqtar mindetterin aityp berdi, dep habarlaidy QazAqparat.
Ulttyq damý jospary úsh baǵyt: azamattardyń ál-aýqaty, institýttardyń sapasy jáne qýatty ekonomika boiynsha 10 jalpyulttyq basymdyqtan turady.
«Sapaly bilim berý» jalpyulttyq basymdyǵy jańa ekonomikalyq baǵytty iske asyrý úshin básekege qabiletti adami kapitaldy damytýdy kózdeidi. Bilim berý júiesin jańǵyrtý onyń sapasy men qoljetimdiligin arttyrýǵa baǵyttalady. 2023 jylǵa qarai pedagogtardyń jalaqysy 2 esege ósedi. 2025 jylǵa qarai – mektepke deiingi mekemelerdegi oryndardyń qoljetimdigi qamtamasyz etiledi. Barlyq bilim berý uiymdarynda inkliýzivti bilim berý úshin jaǵdai jasalady», - dedi spiker Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, 2025 jylǵa deiin bilim berýge qolaily jaǵdai týǵyzý úshin 800 jańa mektep salynady. Bul apatty jáne úshaýysymdyq mektep, oryn tapshylyǵy problemalaryn sheshýge múmkindik beredi.
Sonymen birge, ministr «Qoljetimdi jáne tiimdi densaýlyq saqtaý júiesi» jalpyulttyq basymdyǵy jóninde aityp berdi.
«Meditsinalyq kórsetiletin qyzmetterdiń qoljetimdiligi men sapasyn arttyrýǵa, kadr áleýetin jáne ǵylymi meditsinany damytýǵa, densaýlyq saqtaýdyń biryńǵai tsifrlyq keńistigin qurýǵa, sondai-aq salamatty ómir saltyn qalyptastyrýǵa baǵyttalǵan batyl sharalar iske asyrylatyn bolady. Nátijesinde dárigerlerdiń jalaqysy 2023 jylǵa qarai 2,5 ese ósedi. 2025 jylǵa qarai azamattardyń densaýlyq kórsetkishterin jaqsartýǵa baǵdarlanyp, adamǵa baǵdarlanǵan meditsinasyna kóshý júzege asyrylady, sondai-aq aýyldarda jáne qalalarda sapaly meditsinalyq qyzmet kórsetýge kepildik beriledi», - deidi Ekonomika ministri.
