Búgingi Úkimet otyrysynda Premer-ministr Baqytjan Saǵyntaev Elbasynyń bes áleýmettik bastamasyn negizge ala otyryp birqatar memlekettik organdarǵa joǵary bilim salasynda jyl saiyn qosymsha 20 myń grant bólý men stýdentterge eń kemi 75 myń oryndyq jataqhana salýdy tapsyrdy, dep habarlaidy Baq.kz tilshisi.
«Bilim jáne ǵylym ministrligi Eńbek jáne halyqty áleýmettik qorǵaý, Ulttyq ekonomika, Qarjy ministrlikterimen, basqa da múddeli memlekettik organdarmen, óńir ákimderimen birlesip, jańa ekonomikalyq suranysqa ie mamandardyń qajettiligin taldaý kezinde 2018-2021 oqý jyldaryna arnalǵan joǵary jáne joǵary bilimnen keiingi kadrlardy daiyndaý memlekettik bilim berý tapsyrmasyn bekitý týraly qaýly jobasyn Memleket basshysynyń tapsyrmalaryn eskere otyryp ázirlesin. Joba granttar sanyn 20 myńǵa arttyrýdy, sondai-aq tehnikalyq jáne aýyl sharýashylyǵy mamandyqtary boiynsha qunyn JOO-daǵy granttar deńgeiine deiin kóterýdi qamtamasyz etýi tiis. Bilim jáne ǵylym ministrligi Qarjy, Ekonomika ministrligimen birlese respýblikalyq biýdjetti naqtylaý barysynda atalǵan máselelerdi eskersin», - dedi Baqytjan Saǵyntaev.
Ol 2021 jyldyń sońyna deiin stýdentterdi qosymsha 75 myń oryndyq jataqhanamen qamtýdy tapsyrdy.
«Ulttyq ekonomika, Qarjy, Investitsiialar jáne damý ministrlikterine óńir ákimderimen birlesip JOO, kolledjder jáne developerlik kompaniialarmen memlekettik-jekemenshik seriktestik aiasynda jataqhana salý jumystaryn pysyqtap, 2021 jyldyń sońyna deiin eń kemi 75 myń qosymsha oryndy paidalanýǵa berýdi qamtamasyz etsin. Bul máselege jaýapty - Saǵadiev», - dedi Premer-ministr.
