Keiinge shegerilgen Tokio Olimpiadasy kelesi jyly COVID-19 virýsyna qaramastan ótkiziledi, dep málimdedi Halyqaralyq olimpiada komitetiniń vitse-prezidenti Djon Koýts. Ol Olimpiadanyń 2021 jyldyń 23 shildesinde bastalatynyn rastady. Bul jaiynda BBC agenttigi habarlady.
Olimpiada osy jazda ótýi kerek edi, biraq pandemiiaǵa bailanysty keiinge qaldyryldy. HOK buǵan deiin aitqanyndai, endi keiinge qaldyrý degen bolmaidy.
«Oiyndardyń basty ideiasy – Japoniianyń joiqyn tsýnamiden keiin qaita qalpyna kelýi bolatyn», – dedi Djon Koýts. (Onyń aityp otyrǵany 2011 jylǵy jer silkinisi men tsýnami saldary). «Endi olar týnneldiń sońyndaǵy jaryq, Covid virýsyn simvoldyq túrde jeńetin Oiyndar bolmaq».
Shilde aiynda «Tokio – 2020» uiymdastyrý komiteti jetekshileriniń biri Toshiro Mýto Olimpiada shekteýli aýditoriiamen ótýi múmkin degen bolatyn. Alaida oiyn uiymdastyrýshylary sporttyq sharany múldem kórermensiz ótkizýdi qalamaidy.
Ol Olimpiada oiyndarynyń ashylý jáne jabylý saltanattaryn jeńildetý, sondai-aq qatysýshy elderdiń delegatsiialary men qyzmetkerleriniń sanyn qysqartý qajet bolýy múmkin ekenin aitty.
2020 jylǵy Olimpiadaǵa eki júz el men aýmaqtan 11 myńnan astam atlet qatysady dep josparlanǵan bolatyn. Qoldanystaǵy shekteýler olarǵa qalai áser etetini belgisiz edi, óitkeni qazirgi ýaqytta Japoniia shekarasy negizinen sheteldikter úshin jabyq.
Toshiro Mýto koronavirýsqa qarsy vaktsina oiyn ótkizýdiń mindetti sharty bolmaidy dep málimdedi, degenmen meditsina mamandary vaktsinasyz Olimpiadanyń ótýine kúmán keltiredi.
«Eger vaktsina paida bolsa, jaqsy jańalyq bolar edi. Degenmen biz vaktsinasyz oiyn ótkize almaimyz dep aitpaimyz. Sebebi bul mindetti emes», – dedi Mýto.
Sáýir aiynda uiymdastyrý komitetiniń basshysy Ioshiro Mori eger Olimpiada 2021 jyly ótkizilmese, onda ol múldem ótpeitinin aitty.
Mundai sheshimdi túsindire otyryp, HOK prezidenti Tomas Bah: «Uiymdastyrý komitetiniń 3-5 myń adamnan turatyn shtatyn turaqty ustap otyra almaisyń. Jyl saiyn álemdegi barlyq basty sporttyq oqiǵalardyń kúntizbesin de túzetýge kelmeidi», – dedi.
Pandemiiaǵa deiin Olimpiada tek Dúniejúzilik soǵystarǵa bailanysty toqtatylǵan, biraq eshqashan keiinge qaldyrylmaǵan.
