Májiliste 2021-2023 jyldarǵa arnalǵan respýblikalyq biýdjet týraly» Qazaqstan Respýblikasynyń Zańyna ózgerister men tolyqtyrýlar engizý týraly» QR Zań jobasy qaraldy, dep habarlaidy QazAqparat.
Ulttyq ekonomika ministri Áset Erǵalievtiń aitýynsha, 2021 jylǵa arnalǵan makroekonomikalyq kórsetkishter men biýdjettik parametrler boljamyna naqtylaý engizilip otyr. Makrokórsetkishter boljamy el ekonomikasynyń ósýi boiynsha jedel derekterdi, álemdik ekonomika men naryqtaǵy úrdisterdi eskere otyryp, naqtylandy.
«Jalpy ishki ónimniń ósý qarqyny qańtar aiyndaǵy minýs 4,5 paiyzdan birinshi toqsannyń qorytyndysy boiynsha minýs 1,6 paiyzǵa deiin jetti. Makrokórsetkishterdi naqtylaý kezinde munaidyń ortasha jyldyq baǵasy barreline 50 dollar deńgeiinde aiqyndaldy. Dúniejúzilik bank pen Halyqaralyq valiýta qorynyń boljamdary boiynsha álemdik ekonomikanyń ósýi biyl 4,3% jáne 6% quraidy. Joǵaryda aitylǵandy eskere otyryp, el ekonomikasynyń ósý boljamy 2,8 paiyzdan 3,1 paiyzǵa deiin jaqsardy. Osylaisha ekonomikalyq ósim qalpyna kelý satysynda bolady», - dedi Ulttyq ekonomika ministri Májilistiń jalpy otyrysynda.
Bul rette nominaldy jalpy ishki ónim 77,8 trln teńge kóleminde baǵalanýda.
Syrtqy suranysty qalpyna keltirý aiasynda metallýrgiiadaǵy óndiristiń belsendi ósýi esebinen óńdeýshi ónerkásiptegi boljamdy kórsetkishter 4,1 paiyzdan 5,2 paiyzǵa deiin jaqsardy. Qurylysta josparlanǵan 17 mln sharshy metr turǵyn úidiń berilýine bailanysty boljam 2,5%-dan 5%-ǵa deiin jaqsardy. Aqparat pen bailanysta IT qyzmetterge suranystyń ósý nátijesinde boljam 3,8%-dan 6,5%-ǵa deiin ulǵaidy.
Ulttyq banktiń boljamy boiynsha eksport 10,8 mlrd dollarǵa iaǵni 52,2 mlrd dollarǵa deiin ulǵaiady. Import 37,1 mlrd dollardy kórsetken.
Infliatsiia buryn bekitilgen 4-6% dálizde saqtaldy.
«Túzetilgen makroekonomikalyq boljam negizinde 2021 jylǵa arnalǵan respýblikalyq biýdjet parametrleriniń boljamy naqtylandy. Respýblikalyq biýdjet kiristeri transfertterdi esepke almaǵanda, 2021 jyly 7 204 mlrd teńge kóleminde baǵalanady. Ulttyq qordan kepildendirilgen transfert ózgermeidi jáne 2 700 mlrd teńge mólsherinde saqtaldy. Ulttyq qordan nysanaly transfert 1 trln teńgeden 1 850 mlrd teńgege deiin ulǵaiady. Respýblikalyq biýdjet shyǵystary 15 334 mlrd teńge kóleminde boljanýda. Biýdjet tapshylyǵy jalpy ishki ónimge qatysty 3,5% deńgeiinde boljanyp otyr», - dedi Áset Erǵaliev.
