Ótken jyly elimizge 41,2 mlrd AQSh dollarynyń taýary jetkizildi. Bul týraly Saýda jáne integratsiia ministrligi tehnikalyq retteý jáne metrologiia komiteti tóraǵasynyń orynbasary Qýanysh Elikbaev málim etti, dep habarlaidy QazAqparat.
«Qazaqstan kóptegen elmen syrtqy saýda yqpaldastyǵyn júzege asyryp keledi. Máselen, ótken jyly elimizge 41,2 mlrd AQSh dollarynyń taýary ákelindi. Taýarǵa qoiylatyn basty talaptyń biri ol – qaýipsiz bolýy tiis. Bizdiń mindet tutynýshylardyń qaýipsizdigin qamtý. Taýardyń tutyný qaýipsizdigine qoiylatyn arnaiy tehnikalyq retteý júiesi bar. Búginde olar 60-qa jýyq tehnikalyq reglamentpen bekitilgen», - dedi Qýanysh Elikbaev BAQ ókilderimen ótken baspasóz máslihatynda.
Onyń aitýynsha, elimizge jetkiziletin tamaq ónimderi, jeńil ónerkásip, avtomobil jáne basqa da taýarlar tehnikalyq reglament boiynsha qabyldanady.
«Tehnikalyq reglament boiynsha taýar óndirýshiler men jetkizýshilerge mindetti talaptar qoiylady. Olar taýardyń talapqa sáikes keletindigin rastaýy kerek. Sodan soń taýardy Qazaqstan aýmaǵynda satýǵa, qoldanýǵa sertifikat beriledi. Búginde elimizde 400-den astam synaq zerthanasy jumys isteidi. Sonymen qatar 90-ǵa jýyq taýardy sertifikattaý organy bar. Osy oraida aita ketetin jait, talap qoiý men sertifikat berýmen jumys bitpeidi. Atalǵan talaptardyń oryndalýyn baqylaý qajet. Osy oraida bizdiń komitet jańa zań ázirledi, ol ótken jyldyń shildesinde kúshine endi. Zańda elge kelgen ónim men taýardy qalai baqylaý kerektigi naqty kórsetilgen», - deidi ol.
