2021 jyly ishki eńbek naryǵynda qandai ózgerister boldy? Jumys izdeýshiler kóp boldy ma jáne jalaqy ósti me? Qazaqstandyq HeadHunter kompaniiasy ótken jyldyń qorytyndysyn shyǵardy, dep habarlaidy QazAqparat.
Jumys berýshilerdiń usynysy aitarlyqtai artty
2020 jylmen salystyrǵanda ótken jyly jumys berýshilerdiń hh.kz saityna jariialaǵan habarlandyrýlary 57 paiyzǵa artqan. Iaǵni olar 2021 jyly 350 myńnan astam jumys ornyn usyndy. Bos jumys oryndary kóbine Almaty, Nur-Sultan jáne Shymkent qalalaryna tiesili boldy. Jalpy aitqanda ótken jyly eńbek naryǵy epidjaǵdaidan keiin qarqyndy qalyptasty.
Jumys izdeýshilerdiń belsendilik dinamikasy
Ótken jyly hh.kz saity arqyly 1 mln-nan astam adam jumys izdedi. Jumys izdep túiindemesin jariialaýshylardyń sany 2020 jylmen salystyrǵanda 2021 jyly 2 esege artty. Jumys izdeýshiler negizinen Almaty, Nur-Sultan jáne Shymkent qalalarynyń turǵyndary boldy. Mamandyqtarǵa kelsek, jumys izdeýshiler satý jáne klientpen jumys isteitin menedjer, satýshy-keńesshi, kassir, esepshi jáne júrgizýshi.
Eńbek naryǵyndaǵy básekelestik
2021 jyly hh.kz saitynyń indeksi 2020 jylmen salystyrǵanda 27 paiyzǵa artyp, 2,8 kórsetkishin qurady. Bul degenimiz bir bos jumys ornyna 3 adamnan keldi degen sóz. Bul naryq úshin turaqty jaǵdai.
Jalaqynyń ósimi
Ótken jyly Qazaqstandaǵy ortasha jalaqynyń kólemi 223 myń teńgeni qurady. Bul 2020 jylmen salystyrǵanda 26,6 paiyzǵa joǵary. Ortashadan joǵary jalaqy usynatyn bos jumys oryndary Nur-Sultan, Almaty, Semei, Temirtaý, Atyraý, Petropavl, Qaraǵandy jáne Óskemen qalalarynda boldy.
Kásibi sala boiynsha suranys
Ótken jyly jumys berýshilerdiń deni kásibi baǵyt boiynsha suranystaryn ózgertken joq. Kósh bastaýshy salalar – satý, býhgalterlik esep jáne qarjy, ákimshi qyzmetker, aqparattyq tehnologiialar, internet jáne qurylys pen jyljymaityn múlik.
Kásibi sala boiynsha shekten tys suranys
Jańa bitirgen túlekter men stýdentter, týrizm, qonaq úi, meiramhana qyzmeti, qyzmetkerlerdi basqarý, ákimshilik basqarý, kólik jáne logistika salasy boiynsha mamandarǵa suranys joǵary boldy.
