2021 jyldyń naýryzynan bastap elimizde birqatar avtomobil jolyna aqy alý júiesi engiziledi. Bul týraly «QazAvtoJol» ulttyq kompaniiasynyń basqarma tóraǵasy Ulan Álipov aitty, dep habarlaidy QazAqparat.
«Ótken jyly joldarda aqy alý júiesin engizý boiynsha investitsiialyq konkýrs ótkizgen edik. Atalǵan konkýrsta Computer Vision Technologies kompaniiasy jeńip shyqty. Ol jerde birlesken konsortsiým boldy. Iaǵni, taivandyq kompaniia keńesshilik etti. Olar 11 myń shaqyrym jolda aqy alý júiesin engizýdi josparlap otyr. Jyl sońyna deiin 13 ýchaskedegi aqyly joldardyń uzyndyǵy 5,8 myń shaqyrymǵa deiin jetedi», - dedi ol búgin elordada BAQ ókilderimen kezdesý barysynda.
Onyń atap ótýinshe, aqy alý júiesi engiziletin joldarda qajetti qurylǵylardy ornatý-montajdaý jumystary aiaqtaldy. Keibir ýchaskede júie ilki rejimde jumys istep tur.
«Iaǵni, naýryz-sáýirde aqsha jinaý bastalady. Ondaǵy negizgi mindet - qaýipsizdikti qamtamasyz etý. Bizde joldy kútip ustaýǵa aqshanyń jetispeýshiligi úlken problemaǵa ainalǵan. Osy qarjy jetispeýshiligin aqy alý júiesin engizý arqyly qamtamasyz etý josparlanǵan. Bul jalpy álemdik tájiribe sanalady», - dedi Ulan Álipov.
Aita keteiik, 2021 jyly «Aqtóbe – RF shekarasy (Orynborǵa)», «Oral – RF shekarasy (Saratovqa)», «Oral – RF shekarasy (Samaraǵa)». «Atyraý – Dossor – Beineý – Aqjigit – Ózbekstan shekarasy», «Taraz – Qainar», «Qostanai – RF (Troitskige)», «Pavlodar – RF shekarasy (Ombyǵa), «Qapshaǵai – Taldyqorǵan», «Nur-Sultan – Qostanai», «Nur-Sultan – Pavlodar», «Pavlodar – Semei», «Oral – Aqtóbe», «Aqtóbe – Qarabutaq» joldarynda aqy alý júiesi engiziledi.
