2021 jylǵy 1 qańtardan bastap Qazaqstanda mikroqarjylyq qyzmetti litsenziialaý engiziledi. Bul jaiynda QR Qarjy naryǵyn retteý jáne damytý agenttiginiń tóraiymy Mádina Ábilqasovanyń Májilis depýttarynyń saýalyna bergen jaýabynda aitylǵan, dep habarlaidy "Ult aqparat".
«Biyl naýryzda Qazaqstan Respýblikasy Prezidentiniń tapsyrmasy boiynsha mikrokreditteý sýbektilerine qatysty qatań biliktilik talaptary belgilendi. Olardyń aiasynda lombardtardyń, kredittik seriktestikterdiń basshy qyzmetkerleri men qatysýshylaryna qoiylatyn talaptar kúsheitildi», - dedi agenttik tóraiymy.
Onyń atap ótýinshe, mikrokreditteý sýbektilerin eseptik tirkeýge alý jedeldetildi. Jarǵylyq kapitaldyń eń tómen mólsherine, lombardtardyń qyzmetin uiymdastyrýǵa, olardyń úijailarynyń qaýipsizdigi men tehnikalyq nyǵaitylýyna qoiylatyn talaptar arttyryldy.
«Sonymen qatar, Memleket basshysynyń tapsyrmasyna sáikes 2021 jylǵy 1 qańtardan bastap mikroqarjylyq qyzmetti litsenziialaý engiziletin bolady. Zańnamalyq aktilerge tiisti túzetýlerge Qazaqstan Respýblikasynyń Prezidenti osy jylǵy 3 shildede qol qoidy. Litsenziialaýdy engizý mikroqarjylyq qyzmet sýbektilerin qarjy uiymdaryna jatqyzýǵa jáne tutynýshylardyń quqyqtaryn qorǵaý qaǵidattaryna sáikes keletin qarjylyq kórsetiletin qyzmetter men qarjy naryǵynyń biryńǵai zańnamalyq anyqtamasyn qurýǵa múmkindik beredi. Osylaisha, bankterge jáne mikroqarjylyq qyzmetti júzege asyratyn uiymdarǵa qatysty qaryzdar berýge qatysty retteý men qadaǵalaýǵa qoiylatyn biryńǵai talaptar belgilenedi», - dedi Mádina Ábilqasymova.
