QR Ádilet ministrligi memlekettik organdar men BAQ ókilderine «E-Zańnama» servistik baǵdarlamasyn tanystyrdy, dep habarlaidy QazAqparat.
QR Ádilet ministrliginiń Zańnama departamenti direktorynyń orynbasary Alma Muqanovanyń aitýynsha, 3 jylǵa josparlanǵan jobaǵa jyl saiyn 35 mln teńge qarjy bólinedi.
«Bul aqparattyq júie «Tsifrlyq Qazaqstan» baǵdarlamasynyń 61-qadamyna sáikes qolǵa alyndy. Zań jobalaý jumystaryn elektrondy túrde qalyptastyrý, zań jobasynyń tujyrymdamasynan bastap, sol jobanyń qabyldanýyna deiingi búkil protsesterdi avtomattandyrýdy kózdelgen. Ony 3 kezeńde daiyndap, 2021 jyly tolyqtai engizý josparlanyp otyr. 3 jylǵa 105 mln teńge bólingen. «Zerde» aktsionerlik qoǵamy daiyndaǵan júie kún saiyn jetildirilip jatyr», - deidi Alma Muqanova.
Atalmysh júiede daiyndalyp jatqan zańnamalyq ózgertýler men tolyqtyrýlar memlekettik organdar men «Atameken» ulttyq kásipkerler palatasynyń, akkredittelgen biznes nysandardyń nazaryna usynylady.
«Qazirgi tańda zań jobasyn daiyndaý jumystarynyń bir bóligi qaǵaz nusqada iske asady. Ásirese normalardy birneshe memlekettik organ maquldaý úshin ýaqty kóp ketedi. Al mundai júiede qandai da bir normaǵa qatysty usynystar men taldaýlar, syn-eskertpeler men BAQ-ta jariialanǵan aqparattar bir bazada saqtalady. Osynyń arqasynda zań shyǵarý jumysy jeńildep, oǵan ketetin ýaqyt únemdeledi», - deidi Alma Muqanova.
Qazirgi tańda memlekettik organdardyń «E-Zańnama» baǵdarlamasyna qosylý protsesi júrip jatyr. Keleshekte bul júie «Ashyq Úkimet» júiesimen integratsiialanýy múmkin.
«Eldegi zań jobalaý protsesin qarapaiym halyq «Ashyq Úkimet» júiesi arqyly qadaǵalap otyr. Bolashaqta «E-Zańnama» baǵdarlamasyn atalmysh júiemen integratsiialaý josparlanǵan. Bul júieniń taǵy bir artyqshylyǵy bar. Qandai da bir zań normasyna qatysty aitylǵan usynystar men saraptamalyq taldaýlar, ózge de mańyzdy aqparattar bazada saqtalady. Iaǵni, qajet bola qalǵan jaǵdaida, «E-Zańnama» júiesine kirip, izdegen aqparatty ońai taýyp alýǵa bolady. Joba 2021 jyly tolyqtai engizilip bitedi. Osy aralyqta oǵan degen qyzyǵýshylyq artyp, jumysy nátije berip jatsa, mobildi qosymshasy da shyǵý múmkin», - dedi vedomstvo ókili.
