2021 jyldyń qyrkúieginen joǵary oqý oryndarynyń shtattaǵy oqytýshylary úshin minimaldy jalaqy belgilenedi. Bul týraly QR Bilim jáne ǵylym ministri Ashat Aimaǵambetov málim etti, dep habarlaidy "Ult aqparat".
«Oqytýshylarǵa laiyqty jalaqy tólep, olardyń qalypty jumys atqarýy úshin jaǵdai jasaý - joǵary bilim sapasyn arttyrý úshin mańyzdy. Memleket basshysy Qasym-Jomart Kemeluly Toqaev Ulttyq qoǵamdyq senim keńesiniń otyrysynda joǵary oqý oryndaryndaǵy pedagogikalyq-oqytýshylyq quramnyń jalaqysyn arttyrýǵa qatysty tapsyrma bergen bolatyn. Nátijesinde 2019 jylǵy qyrkúiekte Bilim jáne ǵylym ministrligine tikelei baǵynyshty JOO oqytýshylarynyń jalaqysy 20 paiyzǵa, keiin 2020 jylǵy qyrkúiek aiynda taǵy 20 paiyz ulǵaityldy», - dep jazdy ministr Facebook-paraqshasynda.
Degenmen, onyń atap ótýinshe, qabyldanǵan is-sharalarǵa qaramastan jalaqy kólemin áli de arttyrý qajet. Bul rette, bolǵan jalaqynyń bazasynyń tómen bolýyna bailanysty, tipti jalaqyny 20-40 paiyzǵa ulǵaitý da jetkiliksiz bolyp otyr. Máselen, QazUÝ-da oqytýshynyń ortasha jalaqysy 108 myń teńge bolsa, H. Dosmuhamedov atyndaǵy Atyraý ýniversitetinde 105 myń teńge, Qorqyt Ata atyndaǵy Qyzylorda ýniversitetinde – 101 myń teńge, al Qaraǵandy indýstrialdy ýniversitetinde 99 myń teńge. Mundai jalaqy mólsheri oqytýshylardy asa yntalandyra qoimaityny anyq.
«Keibir joǵary oqý oryndary oqytýshylardyń jalaqysyn kóterý kezinde laýazymdyq jalaqy mólsherin negizge alǵan. Al laýazymdyq jalaqy mólsheri oqytýshylardyń túrli qosymsha aqylardy qosa alǵandaǵy naqty jalaqysynan tómen ekenin aita ketken jón. Basqa joǵary oqý oryndary jalaqyny pedagogikalyq júktemeni kóbeitý arqyly arttyrdy. Nátijesinde birqatar oqý ornynda oqytýshy stavkasynyń kólemi 900 saǵatqa deiin jetti», - dedi ol.
Ashat Aimaǵambetov osyǵan bailanysty Memleket basshysynyń tapsyrmasyn oryndaý úshin eki norma bekitilgenin aitady.
«Birinshi. 2021 jyldyń qyrkúieginen bastap shtattaǵy oqytýshylar úshin minimaldy jalaqy mólsherin belgileý. Iaǵni, 2021 jyldyń qyrkúieginen bastap BǴM-ge vedomstvolyq baǵynyshty joǵary oqý ornynda shtattaǵy oqytýshy aiyna kem degende 200 myń teńge, aǵa oqytýshy – 230 myń teńge, qaýymdastyrylǵan professor – 260 myń teńge; professor 350 myń teńge (ulttyq joǵary oqý oryndarynda – 400 myń teńge) alýy tiis. Bul jalaqynyń eń tómengi mólsheri bolýy tiis. Sondai-aq ár joǵary oqý orny oqytýshylardyń belgili bir jetistikteri úshin basqa da yntalandyrý tólemderin belgilep, tólei alady», - dedi ministr.
Onyń atap ótýinshe, ekinshi normada pedagogikalyq júktemeniń maksimaldy kólemin 1 stavka úshin 680 saǵattan asyrmaý kózdelgen.
«Árine, bul pedagogikalyq júktemesi atalǵan kórsetkishten tómen JOO-lardy (jylyna 450 nemese 500 saǵat) eshteńege mindettemeidi. Iaǵni, saǵat sanyn belgilengen 680-ke deiin jetkizý mindeti turǵan joq. Oqytýshyǵa berilgen 1 stavka kólemi 700-900 saǵat nemese odan joǵary bolatyn joǵary oqý oryndary saǵat sanyn 680-ke deiin tómendetýi kerek. Bul buiryqty erte qabyldap jatqanymyzdyń ózindik sebebi bar: 2021 jyldyń qyrkúiegine deiin JOO basshylaryna ózderiniń shyǵystaryn qaita josparlap, ońtailandyrý jáne kiristerin ulǵaitý úshin ýaqyt beremiz. Atalǵan sheshim joǵary oqý oryndaryndaǵy ákimshilik-basqarý personaly men pedagogikalyq-oqytýshylyq quramnyń araqatynasyn ózgertýge, basqa da mańyzy basym emes shyǵystardy qysqartýǵa jáne biýdjetterdiń shyǵynyn qaita qaraýǵa májbúrleitini anyq. Biz rektorlarmen 2021 jyldyń qyrkúiegine deiin tiisti jumys júrgiziletini týraly kelisimge keldik. Prezidenttiń bul tapsyrmasynyń oryndalý barysyn JOO direktorlar keńesteri men Bilim jáne ǵylym ministrligi baqylaýda ustaityn bolady», - dedi ministr.
