Búgin ortalyq kommýnikatsiialar qyzmetinde «2021 jyl – Qazaqstandaǵy balalar men jasóspirimderdiń kitap oqýyn qoldaý jyly» taqyrybynda onlain brifing ótti, dep habarlaidy "Ult aqparat".
Jiynǵa Mádeniet jáne sport vitse-ministri Nurǵisa Dəýeshov, Qazaqstan Jazýshylar Odaǵynyń Basqarma tóraǵasy Ulyqbek Esdáýlet, jazýshy, jyrshy, dramatýrg Baianǵali Álimjanov, QR Ulttyq akademiialyq kitaphana basshysy Úmithan Muńalbaeva, Atyraý oblysy ǵylymi-ámbebap kitaphanasynyń direktory Sara Izmuhamedova qatysty.
Mádeniet jáne sport vitse-ministri Nurǵisa Dəýeshov Memleket Basshysy Qasym-Jomart Toqaev ótken jyly Ulttyq qoǵamdyq senim keńesiniń IV otyrysynda balalar men jasóspirimder arasyndaǵy kitap oqý máselesiniń mańyzdylyǵyn atap ótkendigin, Prezident bul máseledegi kitaphanalardyń mártebesine nazar aýdara otyryp, elimizdiń barlyq turǵynynyń kúsh-jigerin oqyrman urpaqty tárbieleýge shaqyrǵandyǵyn aitty.
«Osyǵan orai, Qazaqstan Respýblikasynyń Mádeniet jáne sport ministrligi 2021 jyldy «Qazaqstandaǵy balalar men jasóspirimderdiń kitap oqýyn qoldaý jyly», - dep jariialaidy.
Balalar men jasóspirimderdiń kitap oqýyn qoldaý jyly aiasynda ótetin is-sharalar respýblikanyń barlyq óńirin qamtityn bolady»,-dedi Nurǵisa Dáýeshov.
Osydan keiin sóz alǵan Ulyqbek Esdáýlet jazýshylar qaýymy «Balalar jáne jasóspirimder ádebieti jylyn» qoldaitynyn jetkizdi.
«Kitap – adamnyń ishki mádenietin, rýhyn, ultjandylyqty qalyptastyratyn negizgi qural. Osy kitap máselesi, onyń ishinde balalarǵa arnalǵan kitaptar táýelsizdik alǵannan beri kenjelep qalǵany jasyryn emes. Desek te keiingi úsh jylda otandyq baspalardan balalarǵa arnalǵan 364 kitap shyqty. Qazirgi tańda balalar kitaphanasyna 7908 oqyrman tirkelgen. Sońǵy málimetterge súiensek, balalardyń eń kóp oqityn kitaby – burynǵy klassikterdiń shyǵarmalary eken», - dedi ol.
Al Úmithan Muńalbaeva balalar men jasóspirimder ádebietiniń damýyna toqtaldy.
Aita keteiik, búgingi tańda Qazaqstanda 258 balalar men jasóspirimder kitaphanasy jumys isteidi. Onyń 241-i balalarǵa, 11-i jastarǵa, altaýy balalar men jasóspirimderge arnalǵan.
