QR Premer-Ministri Asqar Maminniń tóraǵalyǵymen ótken Úkimet otyrysynda QR eńbek jáne halyqty áleýmettik qorǵaý ministri Birjan Nurymbetov «Eńbek» memlekettik baǵdarlamasynyń iske asyrylý barysy týraly baiandap berdi, dep habarlaidy "Ult aqparat" primeminister.kz saityna silteme jasap.
B. Nurymbetov atap ótkendei, koronavirýs pandemiiasyna qatysty jariialanǵan tótenshe jaǵdai sheńberinde, sózsiz, eńbek naryǵyndaǵy jaǵdai aǵymdaǵy jyldyń ekinshi toqsanynda kúrdeli boldy.
Naýryz-sáýir ailarynda jumyssyz, tabyssyz qalǵan azamattar sany 4 mln asqan. 20 sáýirden bastap karantin shekteýlerin jeńildetý sharalaryna bailanysty, nysandardyń kezeń-kezeńmen jumysqa kirise bastaýynyń yqpalymen bul kórsetkish mamyr aiynda 1 mln adamǵa tómendedi.
«Úkimet tarapynan ekonomikany jańǵyrtý, onyń ishinde jumyspen qamtýǵa basa nazar aýdarý shilde aiynan bastap eńbek naryǵyndaǵy jaǵdaidy turaqtandyrýǵa múmkindik beredi dep sanaimyz», — dedi Birjan Nurymbetov.
Ministrdiń aitýynsha, nátijesinde, jyl aiaǵynda jumyssyzdyq deńgeii 6,1% bolýy yqtimal.
Bul rette ol aǵymdaǵy jyly 1 mln 220 myń adamdy jumyspen qamtý sharalarymen qamtý josparlanǵanyn aitty.
«Oǵan ekonomikany, biznesti qoldaý sharalarynyń barynsha jumys oryndaryn saqtap qalý múmkindigi jáne barlyq memlekettik baǵdarlamalar sheńberinde jańa jumys oryndaryn qurý áleýeti tolyǵymen paidalanylady», — dedi Birjan Nurymbetov.
Onyń ishinde jańa «Jumyspen qamtýdyń jol qartasy» aiasynda 255 myń jumys oryny qurylmaq.
Búginde Jol kartasyna kirgen 6,5 myń jobanyń 5,3 myń jobasy bastalyp, 103 myń jumys orny ashyldy, 91 myń adam tartyldy. Onyń 35% - jastar.
Jol kartasy boiynsha jumystar qarqyny maýsym aiynan bastap tiisti deńgeide oryn alady.
B. Nurymbetov atap ótkendei, Jol kartasyn iske asyrýdyń jan-jaqty áleýmettik–ekonomikalyq oń áseri bar.
Jobalarǵa qatysatyn 255 myń adam 210 mlrd teńge somasyna jalaqy men áleýmettik tólemder alady. Ol óz kezeginde 1 mln jýyq adamnyń tabysyna áser etedi.
Jol kartasy aiasynda otandyq kásiporyndarǵa 700 mlrd teńge kóleminde qoldaý kórsetiledi, 23 myńnan astam orta jáne shaǵyn biznes sýbektileri tapsyrys alyp, keminde myńdaǵan jumys ornyn saqtap qalady.
Sonymen qatar bolashaqta halyqtyń igiligine tietin, áleýmettik aktiv bolyp qalatyn 615 jańa nysan qurylysy iske asrylyp, halyqtyń ómir súrý sapasyna qatysty kóptegen áleýmettik máseleleriniń sheshilýine ákeledi.
«Jol kartasynyń» jobalary aldaǵy ýaqytta mejeles salalarda 100 myńnan astam turaqty jańa jumys oryndaryn qurýǵa negiz qalaidy.
Basqa memlekettik baǵdarlamalar aiasynda búginde qosymsha 93,4 myń jańa jumys orny quryldy. Negizgi úlesi «Nurly jer», «Biznestiń jol kartasy», «Agroónerkásip keshenin damytý», «Tsifrlyq Qazaqstan» baǵdarlamalarynyń enshisinde. Qurylǵan jumys oryndardyń basym bóligi qurylys, saýda jáne aýyl sharýashylyǵy salalaryna tiesili bolyp otyr. Jyl aiaǵyna deiin atalǵan baǵdarlamalar boiynsha barlyǵy 364 myń jumys orny qurylady.
Eńbek ministri «Eńbek» memlekettik baǵdarlamamyn iske asyrýǵa 2020 jyly barlyǵy 176 mlrd teńge qarastyrylǵanyn aitty.
«Jyl basynan beri 225 myń adam baǵdarlama qatysýshysy boldy, onyń ishinde jergilikti jumyspen qamtý ortalyqtary arqyly 184 myń adam jumysqa ornalastyryldy, onyń ishinde 99 myńy turaqty jumysqa ornalasty», — dedi Birjan Nurymbetov.
6 myńnan astam adamǵa biznesin damytýǵa shaǵyn nesieler men granttar berildi.
Elektrondy eńbek birjasy arqyly 97 myń adam jumysqa ornalasty, onyń ishinde 46 myńy turaqty jumysqa ornalasty.
Aǵymdaǵy jyly baǵdarlamanyń barlyq quraldary arqyly 600 myń adamdy jumyspen qamtý sharalaryna tartý josparlanýda. 13 myńnan astam jobaǵa jeńildetilgen shaǵyn nesie berý kózdelgen.
Jumyssyz azamattarǵa, birinshi kezekte jastarǵa eńbek naryǵynda óz orynyn tabýǵa qoldaý retinde baǵdarlamada kásiptik oqytýdyń birqatar túrleri qarastyrylǵan.
Jyl aiaǵyna deiin jańa kásipterdi, daǵdylardy igeremin degen 100 myńnan astam jumyssyz azamattarǵa osyndai múmkindik beriledi.
Jumyssyzdyqqa qatysty áleýmettik qorǵaý sharalarynyń biri - memleket tarapynan sýbsidiialanatyn jumys oryndary. Áleýmettik jumys oryndary, jastar praktikasy, qoǵamdyq jumystar bir jylǵa deiin jumyspen qamtýǵa, jas túlekterge alǵashqy kásibi tájiribe alýǵa múmkindik beredi.
«Óńirlerde jalpy oryndaý qarqyny jaman emes. Josparlanǵan 211 myń jumys ornynan 40% qurylyp, 84 myń adam eńbekke ornalastyryldy», — dedi ministr.
