Ulttyq bank tóraǵasynyń orynbasary Áliia Moldabekova altynvaliýta aktivteri men Ulttyq qordyń 2020 jylǵy aktivteriniń jai-kúii týraly aitty, dep habarlaidy QazAqparat.
Óte aýyr jyl bolǵanyna qaramastan, Ulttyq banktiń altyn valiýtalyq aktivteri $6,7 mlrd-qa nemese tórt ese artyp, jyl sońynda $35,7 mlrd jetti.
«Jyl boiy álemdik naryqtaǵy turaqsyz jaǵdai kezinde biz altyn baǵasynyń rekordtyq kórsetkishke jetkenine kýá boldyq. Jalpy, 2020 jyl ishinde qundy metall baǵasynyń bir ýntsiiasy úshin $1523-dan $1891-ǵa deiin nemese 24% ósti. Osyǵan bailanysty, altyn valiýta qorynyń quramyndaǵy altyn portfeli $4,7 mlrd artty. Altyn valiýta aktivteriniń quramyndaǵy altynnyń úlken úlesi ózin tolyqtai aqtady, sol arqyly syrtqy faktorlar nasharlaǵan kezde, altyn valiýta aktivterin toltyryp, turaqtylyǵyn saqtaýǵa múmkindik berdi. Altyndaǵy aktivter valiýtadaǵy aktivterdiń tartymdylyǵyn tómendetpei, saqtap qalýǵa múmkindik beredi», - deidi Áliia Moldabekova.
Altyn portfeliniń ósimi altyn valiýta aktivterin arttyrǵan jalǵyz faktor emes edi. Máselen, Ulttyq banktegi ekinshi deńgeili bankterdiń valiýtalyq esepshottary da ulǵaidy, shamamen $2,6 mlrd. Oń faktorlardyń áserimen $1,4 mlrd shamasyndaǵy memlekettik qaryz tólenip, valiýtalyq interventsiialar jasaýǵa múmkindik týdy.
«Jeltoqsandaǵy jaǵdaiǵa jeke toqtalǵym kelip otyr: Ulttyq Banktiń rezervteri $3,2 mlrd artty. Qarashyǵanaq Konsortsiýmynan túsken $1,3 mlrd salyq ótemaqysy men Aziia Damý bankinen alynǵan 0,9 mlrd evro kólemindegi úkimettik qaryzdyń esebinen valiýtalyq túsimderdiń arqasynda rezerv osyndai kólemde ulǵaidy. Jeltoqsan aiynda altynnyń baǵasy bir ýntsiiasy úshin $1727 deiin qymbattaǵan soń, jeltoqsan aiynda altyn portfeli de $1,6 mlrd kólemine jetti», - dedi spiker.
Aldyn ala boljam boiynsha, 2020 jyldyń sońynda Ulttyq qordyń aktivteri $58,7 mlrd bolyp, jyl basynan beri $3,1 mlrd azaidy. Aktivterdiń tómendeýine áser etken negizgi sebep – biýdjetke alynatyn Ulttyq qordyń transferti qorǵa túsetin túsimnen arta tústi.
«Ulttyq Bank 2020 jyly kezekti ret óziniń negizgi missiiasyn, iaǵni, ekonomika úshin «qaýipsizdik jastyǵy» rólin atqaryp shyqty. Máselen, koronavirýs pandemiiasynyń saldarymen kúresý úshin Ulttyq qordan bólingen kepildi transferttiń kólemi 2,07 trln teńgeden 4,77 trln teńgege deiin kóbeidi. Al, sol aralyqta, munai baǵasy quldyraǵan soń, jylda Ulttyq qorǵa túsetin túsim bar-joǵy 1,4 trln teńgeni qurady», - dep atap ótti ol.
Solai bola tura, Ulttyq qordy basqarýdyń nátijesi boiynsha jaǵymdy kiris netto-shyǵyndardyń kóp bóligin ótedi.
«2020 jyldyń basyndaǵy koronavirýs pandemiiasynyń saldarynan qarjy naryqtarynyń aitarlyqtai quldyraýyna qaramastan, Ulttyq Bank Ulttyq qordyń aktivterin konservativti túrde bólýden teń bólý tártibine aýysyp, aktsiialar, korporativti obligatsiialar men damýshy elderdiń obligatsiialary siiaqty táýekeldi bolsa da, kiristi aktivterdiń úlesin arttyrdy. Altyn portfelin qalyptastyrý baǵytyndaǵy jumystar jalǵasty. Ótken jyly QR Ulttyq qoryna 1 mlrd AQSh dollaryna teń altyn alyndy. Sonyń nátijesinde, qordyń jinaqtaýshy portfeliniń quramyndaǵy altyn portfeliniń úlesi 4,4% nemese 2,4 mlrd AQSh dollaryna jetti», - deidi spiker.
Sonyń arqasynda, Ulttyq qordyń jaǵymdy kirisine qol jetti. Aldyn ala alynǵan málimetterge sáikes, 2020 jyly Ulttyq qordyń aktivteri boiynsha investitsiialyq kiris $4,1 mlrd. dollardy nemese 7,5% qurady.
