Nur-Sultan qalasynyń Tótenshe jaǵdailar departamenti qysqy mezgildegi órt qaýipsizdigi erejelerin eske saldy, dep habarlaidy "Ult aqparat".
«Statistikalyq málimetterge sáikes, biyl qala aýmaǵynda 587 órt faktisi tirkeldi. Órt saldarynan 20 adam qaza bolyp, 58 adam jaraqat aldy. Órtterdiń negizgi sebepteri – elektr jelilerin montajdaý jáne paidalaný kezinde oryn alǵan órt qaýipsizdigin buzýshylyqtar, jylytý peshterin paidalaný kezindegi buzýshylyqtar jáne adamdardyń otpen abaisyz bolýy. Órtte kóz jumǵan 20 adamnyń 13-i ishimdikke mas bolǵan», - dedi Nur- Sultan qalasy TJD Memlekettik órt baqylaý basqarmasynyń bastyǵy Erkin Otarǵalymuly elorda ákimdiginde ótken brifingte.
Departament ókili turmystaǵy órt qaýipsizdigi erejelerin qatań saqtaýǵa keńes beredi.
«Elektr jelilerin paidalanǵanda olarǵa qosymsha júkteme túsirmeýge, elektr aspaptaryn qoldanǵanda qaýipsizdik erejelerin saqtaýǵa, olardy qaraýsyz qaldyrmaýǵa, qoldan jasalǵan nemese jaramsyz kúidegi elektr qondyrǵylaryn paidalanbaýǵa shaqyramyz. Jylytatyn pesh ústine janǵysh materialdardy, otyndardy, kiim men aiaq kiimdi keptirmeýge jáne peshti kúnine birneshe ret jaǵýǵa keńes beremiz, bul peshti shamadan tys qyzdyrmaýǵa kepildik beredi.
Uiqyǵa keterden 1-1,5 saǵat buryn peshti jaǵyp bitirý kerek. Janyp jatqan peshti baqylaýdy balalarǵa tapsyrmańyz, balalardy jalǵyz qaldyrmańyz, úide tósekte shylym shekpeńiz jáne balkonnan temeki tuqylyn laqtyrmańyz», - deidi E. Otarǵalymuly.
