Kelesi jyly Qazaqstanda taǵy tórt avtotrassa aqyly negizge kóshiriledi. Bul týraly PrimeMinister.kz-ke bergen suhbatynda Indýstriia jáne infraqurylymdyq damý ministrligi Avtomobil joldary komitetiniń tóraǵasy Sairanbek Barmaqov aitty, dep habarlaidy "Ult aqparat".
S.Barmaqovtyń aitýynsha, búginde elimizde 682 shaqyrym avtojol — aqyly. Bular — «Nur-Sultan – Temirtaý», «Nur-Sultan – Shýchinsk», «Almaty – Qorǵas» jáne A»lmaty – Qapshaǵai» baǵyttary.
«Aqyly joldan túsken aqsha tolyǵymen osy joldardy qamtamasyz etýge jumsalady. Buryn olardy qamtýǵa respýblikalyq biýdjetten qarajat bólinetin. Jyl basynan beri biz osy tórt aqyly joldan 4 mlrd 130 mln teńge jinadyq», — dedi komitet tóraǵasy.
Sonymen qatar ol qazirgi ýaqytta respýblikalyq mańyzy bar avtomobil joldarynyń 11 myń shaqyrymyn aqyly etý máselesi qarastyrylyp jatqanyn aitty. Onyń ishinde 2020 jyly — 5,9 myń shaqyrymynda, 2023 jylǵa deiin qalǵan 5 myń shaqyrymynda aqyly júieni engizý josparlanǵan.
Osy jyldyń shildesinde «QazAvtoJol» UK» AQ aqyly júieni engizýge investitsiialyq konkýrs jariialady. Jyl sońyna deiin konkýrs qorytyndysyn shyǵaryp, investormen kelisim jasasý kózdelgen.
Komitet basshysy atap ótkendei, 2020 jyly «Batys Eýropa – Batys Qytai» dálizi, «Shýchinsk – Petropavl» jol ýchaskesi, «Omby – Pavlodar» jáne «Nur-Sultan – Qostanai – RF shekarasyna deiingi jol» aqyly bolady.
«Aldyn ala esepteýler boiynsha, aqyly joldardan alymdar jylyna 40 mlrd teńgeni quraityn bolady. Bul avtomobil joldarynyń ózin-ózi qamtýǵa kóshýge múmkindik berip, investordyń tólemaqy alý júiesin engizýge jumsaǵan shyǵynyn jabýdy qamtamasyz etedi. Osylaisha, joba ózin-ózi aqtaityn bolady jáne memlekettik biýdjetke salmaq túsirmeidi», - dedi ol.
Aita keteiik, búgingi Úkimet otyrysynda QR Indýstriia jáne infraqurylymdyq damý ministri Beibit Atamqulov aqyly joldardan jyl saiyn jinalatyn qarjy 4 mlrd teńgeden asqanyn málim etken bolatyn.
