«QazAgro» ulttyq basqarýshy holdinginiń enshiles kompaniiasy – Aýyl sharýashylyǵyn qarjylai qoldaý qory 2017-jyldan beri «Eńbek» nátijeli jumyspen qamtýdy jáne jappai kásipkerlikti damytý baǵdarlamasynyń ekinshi baǵytyn iske asyryp keledi. Biyldyń ózinde myńnan astam kásipker nesie alyp úlgerdi.
SQO Qyzyljar aýdanynyń Beskól aýylynda turatyn tigin tsehi bar jeke kásipker Baqyt Seiilova kiim qysqartýdan bastap mektep formasyna deiin tigedi. 2010-jyldan beri «Jumyspen qamtýdyń jol kartasy - 2020» jáne «Eńbek» memlekettik baǵdarlamalar arqyly Qordan tórt ret nesie alyp, biznesin keńeitken. Qazirgi ýaqytta 6 adamǵa jumys berip otyr.
«Qazir eńbek etemin degen adamǵa memleket qoldaý kórsetedi. Ony tek tiimdi paidalaný kerek. Men osy kásippen ainalysqaly Aýyl sharýashylyǵyn qarjylai qoldaý qorynan tórt ret nesie aldym. Sonyń arqasynda tigin tsehimdi keńeittim, ainalym kapitalymdy tolyqtyrdym. Jumysym oidaǵydai júrip jatyr», - deidi kásipker Baqyt Seiilova.
Osy aýylda turatyn jeke kásipker Keńes Kýkiev jylqy sharýashylyǵymen ainalysady. Ol da 2014 jáne 2019 jyldary «Jumyspen qamtýdyń jol kartasy - 2020» jáne «Eńbek» memlekettik baǵdarlamasy aiasynda Aýyl sharýashylyǵyn qarjylai qoldaý qorynyń SQO filialynan eki ret nesie alyp, sharýashylyǵyn odan ári damytqan. Búgingi tańda otyz bie saýyp otyrǵan kásipker qymyz daiyndap satady. Sharýashylyqta 3 adam turaqty jumyspen qamtylǵan.
«Aýylda turǵan soń maldyń igiligin kórý kerek dep esepteimin. Ońai olja joq. Bári eńbekpen keledi. Jylqy baǵýdyń da ózindik qiyndyqtary bar. Uqsata bilseń, soǵan orai tabysyn da kórýge bolady. Aýyl sharýashylyǵyn qarjylai qoldaý qorynan eki ret nesie alyp, jylqy basyn kóbeittim, saýyn bielerimniń sanyn arttyrdym. Qymyz ashytyp satamyz. Tabysymyz jaqsy. Úsh adamǵa jumys berip otyrmyn», - deidi Keńes Kýkiev.
Soltústik Qazaqstan oblysy mal sharýashylyǵyna qolaily aimaq. Jeri keń, shóbi shúigin, sýy móldir. Sondyqtan bolar, Qordan nesie alýshylardyń basym kópshiligi mal sharýashylyǵymen ainalysady. Sonyń ishinde jylqy ósirýdi qolǵa alǵan sharýalar kóp.
«Biyl bizdiń filialǵa «Eńbek» baǵdarlamasy boiynsha 2,28 mlrd teńge qarjy bólingen bolatyn. Búgingi tańda onyń 1 mlrd teńgeden astamy igerilip, 286 joba qarjylandyryldy. Jalpy, biyl jyl sońyna deiin 529 kásipkerge nesie berýdi josparlap otyrmyz», - deidi «Aýyl sharýashylyǵyn qarjylai qoldaý qory» AQ SQO filialynyń direktory Abylai Nurkenov.
Qor óziniń nesie ónimderi arqyly aýyl turǵyndary men aýyl sharýashylyǵy taýaryn óndirýshilerdiń jobalaryn túrli maqsatty baǵyttar boiynsha qarjylandyrady. Naqty aitar bolsaq, mal sharýashylyǵyn, ósimdik sharýashylyǵyn, aýyl kásipkerligin damytý jáne aýyl sharýashylyǵy ónimderin qaita óńdeý men saqtaý jobalary bar.
4-6-12 mln teńgege deiingi nesie 6,5 jylǵa 6 protsentpen beriledi. Jyldyq tiimdi syiaqy mólsheri 6,7 protsentten aspaidy. Aita ketý kerek, az qamtylǵan jáne kóp balaly otbasy múshelerine 4 protsentpen beriletin nesieniń jyldyq tiimdi syiaqy mólsheri 4,7 protsentten aspaidy. Bir jylǵa deiingi jeńildik merzimi de qarastyrylǵan.
QR Aýyl sharýashylyǵy ministrliginiń baspasóz qyzmeti
