2020 jyly elektr energiiasyn óndirý kólemi 108 mlrd kVtsaǵ-qa jetti. Bul týraly QR Energetika ministrliginiń alqa májilisinde vedomstvo basshysy Nurlan Noǵaev aitty, dep habarlaidy QazAqparat.
«Qazirgi ýaqytta Qazaqstan Respýblikasynyń Biryńǵai elektr energetikalyq júiesi shtattyq rejimde jumys isteidi. 2020 jyly elektr energiiasyn óndirý kólemi 108 mlrd kVtsaǵ-qa jetti. Bul rette, elektr energiiasyn tutyný 107,3 mlrd kVtsaǵ qurady, bul elimizdiń elektr energiiasyna qajettilikti tolyǵymen qamtamasyz etetindigin kórsetedi», - dedi ministr.
Onyń aitýynsha, 2020 jyly qýat naryǵy aiasynda elektr energiiasyn óndirý sektoryna tartylǵan investitsiialar kólemi 82 mlrd teńgeden asty. Respýblikalyq biýdjet esebinen 31,4 mlrd teńge somasyna 24 joba iske asyrylady, onyń ishinde 6 joba aiaqtaldy. 6 jobany iske asyrý shamamen 120 myń adamdy senimdi jáne úzdiksiz elektrmen jabdyqtaýǵa, 18,1 myń adamdy jáne 10 áleýmettik nysandy jylýmen qamtamasyz etýge múmkindik berdi.
Biýdjetke túsken salyq kiristeri 5 mlrd teńgeden astam somany qurady.
«Elektr energetikasy salasyna investitsiialar aǵynyn ulǵaitý maqsatynda Ministrlik elektr stantsiialaryn jańǵyrtý, rekonstrýktsiialaý jáne jańartý úshin shekti jol beriletin limitti jylyna 10-nan 30 mlrd teńgege deiin ulǵaitý jóninde sharalar qabyldady. Manevrlik qýattar qurylysyn yntalandyrý úshin qoldanystaǵy elektr energetikasy týraly zańnamaǵa túzetýler engizildi. Saladaǵy mańyzdy oqiǵalardyń biri retinde – naryqta ashyqtyqty júzege asyrý maqsatynda Elektr energiiasynyń ortalyqtandyrylǵan saýda júiesin reformalaýdy atap ótýge bolady», - dedi N. Noǵaev.
