2020 jyly Qazaqstannyń densaýlyq saqtaý salasyna 1,5 trln teńge bólinedi. Bul týraly Qarjy ministriniń birinshi orynbasary Berik Sholpanqulov Parlament Senatynyń depýtattaryna 2020-2022 jyldarǵa arnalǵan respýblikalyq biýdjet jobasyn tanystyrý kezinde aityp ótti, dep habarlaidy QazAqparat.
«2020-2022 jyldary densaýlyq saqtaý júiesine arnalǵan qarjy kólemi – 4,7 trln teńge. Onyń ishinde 2020 jyly 1,5 trln teńge bólinedi. Bul soma osy jyldyń deńgeiine qaraǵanda 298,5 mlrd teńgege joǵary. Atalǵan ósim negizinen mindetti áleýmettik meditsinalyq saqtandyrýǵa kóshý jáne meditsina qyzmetkerleri eńbekaqysynyń ulǵaiýyna bailanysty bolyp otyr», - dedi vitse-ministr.
Berik Sholpanqulov sonymen qatar, múgedektigi bar adamdardy áleýmettik qorǵaýdyń tiimdi júiesin qurý maqsatynda Múgedekter quqyǵyn qamtamasyz etý jáne ómir súrý sapasyn jaqsartý jónindegi is-sharalar jospary ázirlengenin jetkizdi.
«Úsh jyldyq biýdjette ony iske asyrýǵa 58,2 mlrd teńge, onyń ishinde 2020 jylǵa 18,9 mlrd teńge bólý josparlanǵan», - dedi ol.
Aita ketsek, búgin Berik Sholpanqulov Parlament Senatynyń depýtattaryna 2020-2022 jyldarǵa arnalǵan respýblikalyq biýdjet jobasyn tanystyryp, bilim jáne ǵylym júiesin damytýǵa 2020-2022 jyldary 3,7 trln teńge bólinetinin málim etken bolatyn.
