Eńbek jáne halyqty áleýmettik qorǵaý ministri Birjan Nurymbetov áleýmettik tsifrlyq ámiiannyń jumysyna qatysty túsinik berdi, dep habarlaidy "Ult aqparat".
«Memleket basshysy Azamattyń áleýmettik tsifrlyq ámiianyn engizýdi, sonymen qatar tiisti taýar ótkizýshi júie qurýdy tapsyrdy. Búginde Eńbek ministrligi tarapynan respýblikalyq biýdjetten jylyna áleýmettik tólemderdiń 39 túri jalpy 3,4 trln teńgege júzge asyrylady. Barlyq tólemder ekinshi deńgeidegi bankterdegi alýshylardyń shottaryna aýdarylady», - dedi ministr Úkimet otyrysynda.
Onyń aitýynsha, Prezidenttiń tapsyrmasyn oryndaý maqsatynda Eńbek jáne halyqty áleýmettik qorǵaý, Saýda jáne integratsiia, Tsifrlyq damý ministrlikteri biraz daiyndyq jumystaryn jasady.
«Endi 2020 jyldyń sońyna deiin ataýly áleýmettik kómekti áleýmettik tsifrlyq ámiian arqyly tóleý tetigin qanatqaqty rejimde iske asyratyn bolamyz. Áleýmettik tsifrlyq ámiian azamattyń jeke sáikestendirý nómiri negizinde pysyqtalady. Ekinshi kezeńde 2021-2022 jyldary atalǵan ministrlikter Ulttyq bank jáne Qarjy naryǵyn retteý agenttigimen birlese resblikalyq, jergilikti biýdjetterden, áleýmettik saqtandyrý ári Biryńǵai jinaqtaý zeinetaqy qorlarynan tólenetin zeinetaqy men járdemaqylardy Áleýmettik tsifrlyq ámiian arqyly tóleý tetikterin iske asyratyn bolamyz», - dedi Nurymbetov.
Aita keteiik, Memleket basshysy Joldaýda azamattyń tsifrlyq áleýmettik ámiian engizý kerektigin málim etti.
