2020 jyly 570 mlrd teńge biýdjet qarajaty tiimsiz paidalanylǵan. Bul týraly QR Parlamenti palatalarynyń birlesken otyrysynda Respýblikalyq biýdjettiń atqarylýyn baqylaý jónindegi esep koitetiniń tóraiymy Natalia Godýnova aitty, dep habarlaidy "Ult aqparat".
«Biýdjettiń atqarylýyna qatań talap qoiylǵandyqtan, ázirge igerý boiynsha jarys júrip jatyr. Biraq sanany nátije alýǵa qarai qaita formattaý áli de oidaǵydai iske asyrylmai otyr. 2020 jyly bólinip, tiimsiz paidalanylǵan biýdjet qarajatynyń somasy 570 mlrd teńgeni qurady. Buǵan respýblikalyq biýdjetke qarajatty qaitarý da, qolma-qol aqshany baqylaý shottaryndaǵy qarajat qaldyqtary da kiredi. Sondai-aq barlyq memlekettik aýdit organdary, sonyń ishinde daǵdarysqa qarsy resýrstardyń jumsalýy boiynsha anyqtaǵan buzýshylyqtar da bar. Nátijesinde bul aqsha pandemiianyń saldaryn jeńildetý úshin ýaqytynda jumys istemedi. Tek bul ǵana emes. Sondyqtan biz ótken jyly Ákimshilik quqyq buzýshylyq týraly kodekske ózgerister engizý kezinde memlekettik resýrstardy tiimsiz paidalanǵany úshin laýazymdy adamdardyń jaýaptylyǵyn kúsheitý jónindegi bastaǵan jumysty jalǵastyrý óte mańyzdy dep esepteimiz», - dedi Natalia Godýnova.
Onyń atap ótýinshe, qoldanystaǵy shyǵystardyń sapasy jáne iske asyrýdan alynatyn áser mánine olardy syni turǵydan qaita qaraý qajettiligi burynnan pisip-jetildi.
«Bul jóninde Memleket basshysy ár sózinde aityp otyrady. Biýdjettiń múmkindikteri shekteýli bolǵan kezde basymdyqtardy naqty aiqyndap, dáiekti túrde belgileý qajet. Bul barlyq josparlanǵan mindettemelerdiń oryndalýyna kepildik beredi jáne qabyldanǵan sheshimderdiń sabaqtastyǵyn qamtamasyz etedi. Memlekettik josparlaýdyń jańa júiesi men ulttyq jobalar buǵan yqpal etedi dep úmittenemiz», - dedi ol.
Komitet tóraiymy depýtattardyń kórsetken qoldaýynyń jáne Ulttyq ekonomika ministrliginiń belsendi róliniń arqasynda salynǵan biýdjet qarajatynan alynatyn ekonomikalyq áserdi baǵalaý negizderi Biýdjet kodeksinde kózdelgenin basa aitty.
«Onyń qalai júzege asyrylatynyn aldaǵy eki jylda kóretin bolamyz. Biraq, Strategiialyq josparlaý jáne reformalar agenttigi men Ulttyq ekonomika ministrliginiń ádisnamalyq úilestirýshi retindegi belsendi ustanymy odan ári de mańyzdy ekeni anyq», - dedi ol.
