2020 jyly Qazaqstanda jańartylatyn energiia kózderinen 3 mlrd kVt/saǵat elektr energiiasy alynady. Bul týraly búgin Energetika ministrliginiń alqa otyrysynda vedomstvo basshysy Nurlan Noǵaev málim etti, dep habarlaidy QazAqparat.
Ministrdiń aitýynsha, elimizde jańartylatyn energetika naryǵy jyl saiyn qarqyndy ósýde. Máselen, 2019 jyly 2018 jyldyń uqsas kezeńimen salystyrǵanda 77,8 paiyz ósimmen 2,4 mlrd kVt/saǵat «jasyl» energiia óndirildi. Elektr energiiasyn óndirýdiń jalpy kólemindegi jańartylatyn energiia kózderiniń úlesi 2,3 paiyzǵa jetip otyr.
«2019 jyly jańartylatyn energiia kózderiniń 21 nysany paidalanýǵa berildi. JEK jobalary boiynsha tartylǵan investitsiialardyń jalpy kólemi 613 mln AQSh dollaryn quraidy. Jalpy qýaty 1050,1 MVt-ty quraityn jańartylatyn energiia kózderiniń 90 nysany iske qosyldy. 2020 jyly jalpy qýaty 605,5 MVt-ty quraityn 18 JEK nysanyn engizý josparlanýda. 2020 jyldyń qorytyndysy boiynsha JEK óndirý jospary shamamen 3 mlrd kVt-saǵatty quraityn bolady», - dedi ol.
Nurlan Noǵaevtyń dereginshe, 2019 jyly jiyntyq qýaty 255 MVt quraityn JEK jobalaryna arnalǵan halyqaralyq aýktsiondyq saýda-sattyqtar elektrondyq formatta ótkizildi. Saýda-sattyq nátijesi boiynsha 12 kompaniia jiyntyq qýaty 202 MVt-qa JEK-ti qoldaý jónindegi qarjy-esep aiyrysý ortalyǵymen 15 jylǵa kelisimshart jasasty.
2020 jyly «Qazaqstan Respýblikasynyń keibir zańnamalyq aktilerine jańartylatyn energiia kózderin paidalanýdy qoldaý jáne elektr energetikasy máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańyn qabyldaý kútilýde. Usynylǵan zań jobasynyń tujyrymdamalyq jańashyldyǵy – manevrlik qýattar qurylysyn yntalandyrý, JEK-ti qoldaýǵa baǵyttalǵan tolassyz tarifti engizý, JEK-ti damytý úshin qolaily jaǵdai jasaý.
