«2020 - 2022 jyldarǵa arnalǵan respýblikalyq biýdjet týraly» zańǵa sáikes, 2020 jylǵy 1 qańtardan bastap yntymaqty zeinetaqy mólsheri 7%-ǵa ósti, al eń tómengi zeinetaqy mólsheri 38 636 teńgeni qurady, – dep habarlaidy QR Eńbek jáne halyqty áleýmettik qorǵaý ministrliginiń baspasóz qyzmeti.
Memlekettik bazalyq zeinetaqy tóleminiń mólsheri 5%-ǵa ósti, onyń eń tómengi mólsheri 16 839 teńgeni qurady. Bul ósim 2 millionnan astam zeinetkerge áser etti. Sonymen qatar, 2020 jylǵy 1 qańtardan bastap eń tómengi kúnkóris deńgeiiniń ózgerýine bailanysty múgedektigi boiynsha, sondai-aq asyraýshysynan airylý jaǵdaiy boiynsha memlekettik áleýmettik járdemaqylardyń mólsheri 5%-ǵa artty.
Nátijesinde birinshi toptaǵy jalpy aýrýdan múgedektik boiynsha beriletin memlekettik járdemaqy mólsheri 59 872 teńgeni, ekinshi top - 47 710 teńgeni, úshinshi top – 32 431 teńgeni qurady. Asyraýshysynan airylǵandarǵa beriletin járdemaqy asyraýyndaǵy adamdar sanyna bailanysty 26 818 teńgeden 65797 teńgege deiin boldy.
Sonymen birge, jetim balalarǵa beriletin memlekettik járdemaqy mólsheri árqaisysy úshin 36 796 teńgeni qurady, biraq otbasynyń barlyq múgedek músheleri úshin 79 829 teńgeden aspaidy. Bul ósim shamamen 680 myń memlekettik áleýmettik járdemaqy alýshylarǵa áser etti. Ailyq eseptik kórsetkish shamasynyń ózgerýine bailanysty 2020 jylǵy 1 qańtardan bastap № 1 jáne № 2 tizimder boiynsha memlekettik arnaiy járdemaqylardyń mólsheri de 5% - ǵa artty. 2020 jylǵy 1 qańtardan bastap № 1 tizim boiynsha memlekettik arnaiy járdemaqylardyń mólsheri 24 973 teńgeni, № 2 tizim boiynsha – 22 216 teńgeni quraidy.
