QR Premer-Ministri Asqar Maminniń tóraǵalyǵymen ótken Úkimet otyrysynda biylǵy qańtar-tamyzdaǵy elimizdiń áleýmettik-ekonomikalyq damýynyń jáne respýblikalyq biýdjettiń oryndalý qorytyndylary qaraldy. QR aýyl sharýashylyǵy ministri Saparhan Omarov elimizdiń agroónerkásiptik keshenindegi 2020 jyldyń 8 aiyndaǵy jumys nátijeleri týraly baiandady, dep habarlaidy primeminister.kz saity.
Biylǵy 8 aidyń qorytyndysy boiynsha jalpy aýyl sharýashylyǵy óniminiń kólemi 4,9%-ǵa ulǵaiyp, 2,4 trln teńgeni qurady. Bul ósim negizinen ósimdik sharýashylyǵyndaǵy óndiris kóleminiń 10,7%-ǵa ulǵaiýy esebinen qamtamasyz etildi. Oblystar bólinisinde 3 oblysta respýblikalyq deńgeiden joǵary qarqyn baiqaldy (Aqmola oblysy – 119,2%, Soltústik Qazaqstan oblysy – 110,9% jáne Qostanai oblysy – 105,8%).
Ministr atap ótkendei, biylǵy egin jinaý qarqyny ótken jylǵa qaraǵanda joǵary. Máselen, búgingi tańda respýblika boiynsha dándi jáne dándi-burshaqty daqyldardyń shamamen 11,1 mln ga alqaby nemese jinalýǵa tiis alqaptyń 70,2%-y jinaldy, al ótken jyly osy kezeńde 5,3 mln ga nemese jinalýǵa tiis alqaptyń 34,8%-ynda egin jinalǵan bolatyn. Ortasha túsimdiligi gektaryna 11,7 tsentnerden 13 mln tonna astyq bastyryldy.
«Mal sharýashylyǵy óniminiń jalpy kólemi kórsetilgen kezeńde 2,7%-ǵa ulǵaiyp, 1,6 trln teńgeni qurady. Bul rette tiridei salmaqtaǵy et óndirý kólemi 3,7%-ǵa, sút 3%-ǵa ulǵaidy», — dedi ministr.
Kórsetilgen merzimde tamaq ónimderin óndirý kólemi 3,6%-ǵa ósip, 1 229,3 mlrd teńgeni qurady.
Atap aitqanda, óńdelgen kúrish óndirý kóleminiń 61,1%-ǵa, shujyq ónimderiniń 22,8%-ǵa, sary maidyń 12,9%-ǵa, qus etiniń 12,3%-ǵa, jarmanyń 12,2%-ǵa, makaronnyń 8,4%-ǵa, unnyń 6,4%-ǵa, qyshqyl sút ónimderiniń 4,7%-ǵa, ósimdik maiynyń 1,8%-ǵa artqany baiqaldy.
«Aýyl sharýashylyǵynyń negizgi kapitalyna salynǵan investitsiialar 9,1%-ǵa ulǵaiyp, 292 mlrd teńgeni, tamaq ónimderi óndirisine salynǵan investitsiialar 25,4%-ǵa artyp, 54,7 mlrd teńgeni qurady», — dep túiindedi Omarov.
