QR birinshi qarjy vitse-ministri Berik Sholpanqulov Úkimettegi baspasóz konferentsiiasynda Qazaqstandaǵy kóleńkeli ekonomika deńgeiin tómendetý sharalary týraly aitty, dep habarlaidy "Ult aqparat" primeminister.kz saityna silteme jasap.
B. Sholpanqulov atap ótkendei, biznesti «kóleńkeden» shyǵarý jumystary salyq jáne keden saiasatyn jetildirý jáne qolma-qol aqshasyz ainalymnyń úlesin arttyrý arqyly júzege asyrylyp jatyr.
«Iske asyrylyp jatqan sharalar salyqtyq jáne kedendik ákimshilendirýdi tsifrlandyrýǵa, aqparattyq júielerdi integratsiialaýǵa negizdelgen, munda aqparattyq júielerdi damytý sekildi bastamalardy iske asyrýdan úlken nátije kútiledi, olar: ónimdi tańbalaý, elektrondy shot-faktýralar, "Virtýaldy qoima" modýli, táýekelderdi basqarý júiesi, onlain-kassalyq baqylaý mashinasyn engizý jáne t.b.», — dedi B. Sholpanqulov.
Onyń aitýynsha, taýarlardy baqylaý júiesin qurý ekonomikany kontrafaktilik ónimderden qorǵaýǵa kómektesedi. Sonymen, «Elektrondyq shot-faktýralar» AJ túpkilikti tutynýshyǵa deiin taýarlardyń qozǵalysyn baqylaýǵa múmkindik beredi, «Virtýaldy qoima» modýli taýarlardyń qozǵalysyn avtomatty túrde baqylaýǵa múmkindik beredi.
«Naqty qadaǵalaý turǵysynan taýarlardy tańbalaý jumystary júrgizilip jatyr. Teri buiymdary boiynsha pilottyq jobanyń nátijesinde 2018 jyly kirister 1,5 esege ósti. Búginde temeki men alkogol ónimderi boiynsha pilottyq joba júrgizilýde», — dedi birinshi qarjy vitse-ministri.
Sonymen qatar, osy jyldyń 1 qańtarynan bastap shaǵyn jáne orta bizneske arnalǵan salyqtyq raqymshylyq jasaý jumystary bastaldy. 90 myńǵa jýyq salyq tóleýshige raqymshylyq jasalady. Olardyń 45%-yna raqymshylyq jasaldy. Negizgi maqsat — salyq túsimderin arttyrý.
B. Sholpanqulovtyń aitýynsha, blokchein tehnologiiasy arqyly QQS baqylaý shotyn qoldana otyryp, QQS-ty basqarýdyń jańa ádisi engizilgen.
QQS baqylaý shotyn qoldanatyn salyq tóleýshilerge qatysty salyqtyq tekserýler QQS qaitarylǵan kezde alynyp tastalady, QQS qaitarý merzimi 55-ten 15 jumys kúnine deiin qysqardy.
Taýarlar qozǵalysyn baqylaýdyń sońǵy kezeńi - 2020 jylǵy 1 qańtardan bastap onlain-kassalyq baqylaý mashinalaryn paidalanýǵa jappai kóshý, bul reidtik tekserýlerden qashyqtan salyqtyq baqylaý júrgizýge kóshýge ákeledi.
Sonymen qatar, EAEO aýmaǵy boiynsha taýarlar tranzitiniń biryńǵai júiesin qurý jumystary júrgizilip jatyr. Qyrǵyzstannan Resei Federatsiiasyna Qazaqstan aýmaǵy arqyly tranzittik taýarlardy baqylaý maqsatynda navigatsiialyq elektrondyq plombalardy paidalaný boiynsha pilottyq joba iske qosyldy.
B. Sholpanqulovtyń aitýynsha, kóleńkeli ainalymdy azaitý boiynsha ministrliktiń negizgi mindetteriniń biri — «ainaly» kedendik statistikadaǵy sáikessizdikterdi azaitý.
Úshinshi elderden ákelinetin taýarlardyń túsimderiniń 30%-yn Qytaidan shyqqan taýarlar quraidy. Osyǵan bailanysty, jaqynda Ministrliktiń Memlekettik kirister komiteti men QHR-dyń Bas kedendik basqarmasy arasynda ózara yntymaqtastyq týraly tiisti hattamalarǵa qol qoiyldy. Usynylǵan bastamalardyń nátijesi biýdjetke 800 mlrd teńge kóleminde qosymsha túsimder túrinde kútiledi.
«Júrgizilip jatqan bastamalar men qabyldanyp jatqan sharalar kóleńkeli ekonomikany azaitýǵa, biýdjetke salyqtyq jáne kedendik túsimderdiń ulǵaiýyna jol ashady», — dep túiindedi B. Sholpanqulov.
