Ótken jyly Memleket basshysynyń tapsyrmasymen Úkimet COVID-19-ke jumyldyrylǵan barlyq meditsina qyzmetkerlerin materialdyq yntalandyrý jáne eńbek jaǵdailary qaýipsizdigin barynsha qamtamasyz etý boiynsha aýqymdy jumys júrgizdi. Elimizdiń Densaýlyq saqtaý ministrligi koronavirýs infektsiiasyn juqtyrý táýekeliniń 3 toby boiynsha meditsina qyzmetkerleriniń negizgi jalaqysynan bólek, ai saiynǵy tólemder jasady.
Atap aitqanda, «táýekeli óte joǵary» topqa kiretin reanimatsiia bólimshelerin qosa alǵan infektsiialyq statsionarlarda jumys isteitin dárigerlerdiń, ortasha jáne kishi meditsina qyzmetkerleriniń negizgi jalaqysyna qosymsha 850 myń tólendi. «Joǵary táýekel» - bul provizorlyq statsionarlar men jedel kómek dárigerleri, orta jáne kishi meditsina qyzmetkerleri. Olar negizgi jalaqylaryna 425 myń teńge aldy. «Ortasha táýekelge» karantindik statsionarlardyń dárigerleri, orta jáne kishi meditsina qyzmetkerleri, jedel járdem sanitarlyq dárigeri, júrgiýshiler jáne taǵy basqalary kirdi. Bul topqa kirgender negizgi jalaqylaryna 212,5 myń teńge ústemeaqy alyp otyrdy.
Epidemiiaǵa qarsy is-sharalarǵa tartylǵan meditsina qyzmetkerleri men mamandarǵa ústemeaqy tóleý Áleýmettik meditsinalyq saqtandyrý qoryna júktelgen. Atalǵan qordyń málimetterine sáikes, 2020 jyldyń qarasha aiynyń qorytyndysynda COVID-19-ben virýstyq pnevmaniiamen kúreske jumyldyrylǵan shamamen 42 myń meditsina qyzmetkeri jalaqylaryna ústemeaqy aldyn Tólem somasy 9,7 mlrd teńgeden asyp jyǵylady. Jalpy, ótken jyldyń naýryzy men qazany aralyǵynda, naqty aitqanda naýryzda 19 340, sáýirde 42 926, mamyrda 40 416, maýsymda 53 160, shildede 78 963, tamyzda 66 249, qyrkúiekte 36 503, qazanda 37 893 meditsina qyzmetkerine ústemeaqy berildi. Bul maqsatqa Áleýmettik meditsinalyq saqtandyrý qorynan 88,9 mlrd teńge jumsaldy. Al dárigerler jeltoqsan aiyna ústemaqy áli alǵan joq. Onyń esebin jergilikti atqarýshy organdar shyǵaryp jatyr. Olardan úsemeaqyǵa qatysty esep-qisap kelgennen keiin qor tólem jasaidy.
Joǵaryda ár aiǵa kórsetilgen derekterden ústemeaqy alǵan dárigerler sanynyń birde artyp, endi birde kemip otyrǵandyǵyn baiqaýǵa bolady. Munyń sebebin túsindirgen qordyń ýájine qaraǵanda, dárigerlerge ústemeaqy elimizdegi epidemiologiialyq ahýaldyń ózgerýine bailanysty tólenip otyrǵan. Máselen, jaz ailarynda koronavirýs infektsiiasy órshigen kezde ústemeaqy alǵan dárigerdiń qatary da kóp bolǵandyǵyn baiqaý qiyn emes.
«Eldegi epidemiologiialyq ahýalǵa bailanysty koronavirýs infektsiiasynyń taralýy jaǵdaiynda jumys istegen qyzmetkerlerdiń sany ai saiyn ózgerip otyrady. Soǵan orai jedel shtabtar janyna qurylǵan óńirlik komissiialar túzetin ústemeaqy alýshylardyń tzimi ózgeredi. Óńirlik shtabtardy ákimderdiń orynbasarlary basqarady. Sonymen qatar komissiia quramyna Áleýmettik meditsinalyq saqtandyrý qory filialdarynyń qyzmetkerleri, óńirdiń bas memlekettik sanitar dárigeri, densaýlyq saqtaý basqarmasynyń úkimettik emes uiymdardyń ókilderi kiredi», - dep atap ótedi qordan.
Áleýmettik meditsinalyq saqtandyrý qorynyń atap ótýinshe, meditsina qyzmetkerlerinde ústemeaqy tóleýge bailanysty suraqtar týyndaityn bolsa, onda olar óńirlik komissiialarǵa júginýileri qajet.
Este bolsa, ótken jyldyń 27 mamyrynda Ulttyq qoǵamdyq senim keńesiniń III otyrysynda Memleket basshysy 2023 jylǵa qarai dárigerlerdiń jalaqysyn ekonomikadaǵy ortasha eńbekaqynyń 2,5 esesine deiin birtindep jetkizý qajettigin atap ótken bolatyn. Osyǵan orai 2021-2023 jyldarǵa arnalǵan respýblikalyq biýdjet týraly zańnyń jobasynda Densaýlyq saqtaý ministrliginen dárigerler men orta meditsina qyzmetkerleriniń jalaqysyn arttyrýǵa 2021 jyly 156,8 mlrd teńge, 2022 jyly 255,1 mlrd teńge, 2023 jyly 393,1 mlrd teńge kózdelgen. Sonymen qatar MÁMS qarajaty esebinen dárigerler men orta meditsina qyzmetkerleriniń jalaqysyn arttyrýǵa 2021 jyly 65,6 mlrd teńge, 2022 jyly 106,6 mlrd teńge, 2023 jyly 164,4 mlrd teńge baǵyttalady.
247 myń meditsina qyzmetkeriniń jalaqysyna arnalǵan shyǵystardyń jalpy somasy 2021 jyly 222,3 mlrd teńgeni, 2022 jyly 361,7 mlrd teńgeni, 2023 jyly 557,5 mlrd teńgeni quraityn bolady. Osylaisha, dárigerlerdiń ortasha jalaqysy 2023 jyly ekonomikadaǵy ortasha jalaqynyń 2,5 esesin quraityn bolady. Bul rette barlyq yntalandyrýshy tólemderdi qosa alǵanda dárigerdiń ortasha jalaqysy 2021 jyly 320 myń, 2022 jyly 416 myń, 2023 jyly 561 myń teńgeni, orta meditsina qyzmetkeriniń jalaqysy 2021 jyly 166 myń, 2022 jyly 183 myń, 2023 jyly 201 myń teńgeni quraityn bolady.
Máselen, 1 stavkada dárigerdiń ortasha bazalyq jalaqysy yntalandyrýshy tólemderdi esepke alǵanda 2020 jylmen salystyrǵanda 2021 jyly statsionarda 188,5 myńnan 244 myńǵa, ambýlatorlyq-emhanalyq kómekte 180 myńnan 240 myń teńgege jetkiziledi. 1 stavkadaǵy orta meditsina qyzmetkeriniń ortasha jalaqysy 2021 jyly statsionarda 133 myńnan 155 myńǵa, ambýlatorlyq-emhanalyq kómekte 129 myńnan 154 myńǵa artady.
