Ótken jyly koronavirýs elimizdiń búkil aýmaǵynda órship ketkende kovidke qarsy dári-dármek turmaq qarapaiym meditsinalyq maska men dárihana sóresinde tolyp turatyn ystyq túsiretin aspirinniń ózi qat dúniege ainalyp shyǵa kelgeni bar. Tipti, olardyń baǵasy sharyqtap ta shyǵa kelgen edi.
Máselen, nebári 15-25 teńge aralyǵyndaǵy meditsinalyq maskanyń quny 200 teńge jetip jyǵyldy. Mundai jaittyń oryn alýyna ardy belge túiip paida tabýǵa tyrysqan pysyqailardyń da tirligi túrtki ekeni belgili.
Óitkeni, sol dárihanada joq aspirin býma-býma bolyp bazarlarda saýdalanyp jatty. Sondyqtan da bilik, jergilikti atqarýshy organdar tez arada sheship qabyldap, quramynda ákimdik, qoǵam ókilderi, meditsina mamandary, men politsiia qyzmetkerleri bar toptar quryldy.
Olar dárihanalardy aralap baǵany negizsiz kótergenderdi anyqtady. Qara bazarda koronavirýsqa qarsy taǵaiyndalatyn dárilik zattardy zańsyz satqandardy áshkereledi. Dári-dármek alypsatarlyǵymen ainalysqan talai adam jazalandy da.
Mine, osydai jaittan keiin Memleket basshysy Qasym-Jomart Toqaev Úkimet aldynda dárilik zattardyń, meditsinalyq maskanyń jáne koronavirýsty anyqtaityn PTR-testiniń baǵasyn tómendetý týraly naqty tapsyrma qoidy.
Tapsyrma oryndalyp ta jatyr. Elimizdiń barlyq óńirinde meditsinalyq maska shyǵaratyn kásiporyndar qurylyp, jedel jumysqa kiristi. Búginde elimizde táýligine 1 millionǵa jýyq maska shyǵarylady. Nátijesinde qorǵanysh maskalaryna 40 teńge, bir rettik meditsinalyq maskalarǵa 60 teńge mólsherinde shekti bólshek saýda baǵasyn belgiledi.
Otandyq maskanyń sapasy da jaqsy. Olar saýda túspes buryn birneshe márte saraptamadan ótkiziledi.
Saraptama birneshe kezeńnen turady: Densaýlyq saqtaý ministriniń buiryǵyna sáikes, tolymdylyǵyn tekserý úshin qujattardy jáne tirkeý qujattarynyń materialdaryn validatsiiadan ótkizý.
Odan keiingi kezeńde sarapshylar mamandandyrylǵan saraptamada qujattardyń halyqaralyq jáne ulttyq standarttarǵa sáikestigin synaqtan ótkizedi. Biologiialyq zertteýler esebi meditsinalyq maska adamnyń terisine tikelei janasyp turatyndyqtan, onyń qaýipsizdigin rastaýy tiis.
Odan bólek, joǵary tynys alý joldary - muryn qýysy men aýyzǵa jaqyn qoldanýǵa arnalýy qajet. Tehnikalyq synaqtyń nátijesi maskanyń tiimdiligin tekserýge, ol aýany qalai súzetinin, bakteriia men virýstardy ustaýda qaýqarlyǵyn bilýge múmkindik beredi.
Árine, osynaý dáleldi bazanyń bárin de zertteý úshin sarapshylar osy synaqtar men zertteýler qalai ótkizilgenin, olardyń qorytyndysy qalai rásimdelgenin qadaǵalaýy tiis. Sońynda maska úlgileri sarapshylar uiymynyń Synaq ortalyǵyna túsedi.
Osy synaqtardyń nátijesinde meditsinalyq maska úlgileriniń shynaiy kórsetkishteri aiqyndalady. Tekseristiń mundai amaly tutynýshyǵa sapaly, tiimdi ári qaýipsiz meditsinalyq maskanyń jetkizilýin qadaǵalaýǵa múmkindik beredi.
Kovidke qarsy dárilik zattardyń da baǵasy tómendedi.
Oǵan QR Densaýlyq saqtaý ministrliginiń «Tegin meditsinalyq kómektiń kepildik berilgen kólemi aiasynja jáne (nemese) mindetti áleýmettik meditsinalyq saqtandyrý júiesinde dárilik zattardyń, sondai-aq meditsinalyq buiymdardyń shekti baǵalary men ústeme baǵalaryn retteý jáne qalyptastyrý qaǵidalaryn bekitý týraly» erejesiniń ótken jyldyń 24 jeltoqsanynda kúshine enýi sep bolyp otyr.
Bul ózgerister koronavirýs infektsiiasyn emdeý úshin qoldanylatyn dárilik zattarǵa arnalǵan shekti baǵany qalyptastyrýdyń erekshe tártibin qarastyrady. Iaǵni, kovidke qarsy shamamen 230 preparattyń baǵasy ortasha eseppen 27 paiyzǵa arzandady.
Jalpy, Qazaqstan Respýblikasynyń aýmaǵynda shekteý is-sharalary, onyń ishinde karantin, tótenshe jaǵdaidy engizý, áleýmettik, tabiǵi jáne tehnogendik sipattaǵy tótenshe jaǵdailardyń týyndaýy kezeńinde kóterme jáne bólshek saýdada ótkizý úshin, sondai-aq tegin meditsinalyq kómektiń kepildendirilgen kólemi aiasynda jáne Mindetti áleýmettik meditsinalyq saqtandyrý júiesinde dárilik zattarǵa shekti baǵalardy qalyptastyrýdyń erekshe tártibi júzege asyrylady.
Ótken jyldyń sáýir aiynda respýblika aýmaǵynda koronavirýs infektsiiasy taraǵan sátte PTR ádismen COVID-19 arnalǵan testileýdi ótkizetin 19 ǵana zerthana bolatyn.
Testileý baǵasy da qarapaiym halyqtyń qaltasyna salmaq túsiretin, 18 myń teńgege jetip jyǵylatyn. Olardyń táýliktik qýaty nebári 6 myń ǵana test edi.
Osydan keiin el Prezidenti Qasym-Jomart Toqaev Úkimet pen jergilikti ákimdikterge testileýdiń qarylyq máselesin shuǵyl retteýdi tapsyrǵany este.
Al búginde elimizdiń barlyq óńirinde koronavirýs infektsiiasyn diagnostikalaýǵa arnalǵan 132 zerthana men biologilyq material jinaityn 48 pýnkt jumys istep tur.
Zerthanalardyń táýliktiń qýaty 100 myń zertteýge jetedi.
QR Densaýlyq saqtaý ministrliginiń deregine sáikes, búginge deiin elimizde 5 millionnan astam zertteý júrgizildi. Zerthanalar kúndelikti 40 myńǵa deiin test ótkizedi.
Demek, zerthanalardyń rezervtik qýaty 60 myń zertteý degen sóz. Bul halyqty testileýmen qamtamasyz etýge jetkilikti.
Aita keterligi, elimizge koronavirýstyń syrttan kelýi áli de tyiylmai otyr. Máselen, sońǵy úsh aidyń ishinde áýe reisterimen 155 myń adam kelsek, olardyń ishinde 75 jolaýshydan koronavirýs anyqtalǵan bolatyn.
Al avtomobildermen elimizdiń shekarasyn 440 myń adam kesip ótip, olardyń arasynda 666 adamnyń koronavirýspen aýyratyndyǵy anyqtalyp otyr.
