Mekteptegi oqýshylarynyń basty bilim syny - Ulttyq biryńǵai testileý (UBT) men Oqý jetistigin syrttai baǵalaý (OJSB) júiesine 2019 jyly qandai ózgerister engiziledi? Bul týraly Astanada ótip jatqan «Nur Otan» partiiasy bastaýysh uiymdarynyń respýblikalyq forýmynda Bilim jáne ǵylym vitse-ministri Ashat Aimaǵambetov aitty.
«Mańyzdy suraqtardyń biri - testilerge engiziletin ózgerister. Máselen, bizde qazir UBT men OJSB bar. Qazirgi tańda bizdiń muǵalimder bir máseleni kóterip otyr. Olardyń aitýynsha, ministrlik jańartylǵan bilim mazmunyn engizip jatsa, demek fýnktsionaldy saýattylyqqa mán berý kerek. Iaǵni, oily daǵdyǵa basa den qoiylýy tiis. Muǵalimderdiń sózine qulaq assaq, qazir UBT men OJSB kezinde eń aldymen este saqtaýǵa mańyz beriledi», - deidi vitse-ministr.
Ashat Aimaǵambetovtyń aitýyna qaraǵanda, Memleket basshysynyń tapsyrmasyna sáikes UBT men OJSB formaty emes, suraqtarynyń mazmunyna ózgeris engiziletin bolady. «Demek, mektep oqýshylary endi «qashan jáne qai jyly?» degen suraqqa emes, kóbinese «qalai jáne nege?» degen suraqqa jaýap beretin bolady. Bizge eń aldymen balalardyń oilaý qabileti, bilimin qoldana bilýi men taldaýy mańyzdy», - dedi ol.
Eske sala ketsek, elordadaǵy Kongress-ortalyqta «Nur Otan» partiiasy bastaýysh uiymdarynyń respýblikalyq forýmy ótip jatyr.
