Endi qyzylordalyq Qazposhta qyzmetkerleriniń qyzmeti dron arqyly iske asatyn bolady. Bul jóninde óńirlik kommýnikatsiialar qyzmetiniń aqparattyq alańynda «Qazposhta» AQ Qyzylorda filialynyń direktory Aida Ábibýllaeva málimdedi.
Jiyn aýdandyq, qalalyq poshta toraby basshylary jáne Jańaqorǵan, Shieli aýyldyq poshta bólimsheleri qyzmetkerleriniń qatysýymen ótkizildi. Jiyn barysynda sala boiynsha kóptegen máseleler talqylandy. Negizgi suraq – sapa jaiynda boldy. Odan keiin jospardyń oryndalýy, elektrondyq kommertsiia, franchaizing, tártip, biliktilik, sharýashylyq máseleleri jaiynda sóz qozǵalyp, birqatar máseleler qarastyryldy.
Byltyrǵy jylmen salystyrǵanda Qyzylorda oblystyq filialy ózge oblystyq filialdarǵa qaraǵanda eń úlken ósimge, iaǵni 12 %-ǵa qol jetkizip otyr.
Atalǵan óńirde «Qazposhta» AQ tez arada jetýi tiis qajetti zattardy alys-shalǵai jerlerge drondar arqyly jetkizýdi josparǵa qosyp, ony oryndaý úshin jumystar júrgizýde.
Búginde elimizdiń birqatar oblystary drondardy qoldanýdan kóp artyqshylyqtarǵa ie bolyp otyr. Máselen gazet-jýrnaldardy jetkizýge kóp shyǵyndalmaidy.
«Qazirgi tańda Qaraǵandy, Astana, Almaty oblystary bul drondar arqyly poshta sálemdemelerin jetkizýde. Dron 500 shaqyrymǵa deiin ushady. Ol tek gazet-jýrnaldar ǵana emes sondai-aq, salmaǵy 5 kilogrammǵa deiingi shaǵyn sálemdemelerdi de jetkizýge qabiletti. Hat-habardy avtokólikpen tasymaldaýǵa shamamen 4 saǵat ýaqyt jumsalsa, bul aralyqty dron bar-joǵy 40 minýtta erkin eńseredi. Eń bastysy – únemdi ári qolaily. Mundai drondarǵa usynys berildi, 2019 jylǵa iske qosý josparlanyp otyr», – dedi «Qazposhta» AQ Qyzylorda filialynyń direktory Aida Ábibýllaeva.
Aita ketelik, búgingi tańda «Qazposhta» AQ Qyzylorda oblystyq filialynyń 238 000-nan astam tutynýshysy barlyq derlik qyzmetterdi paidalanýǵa múmkindik alyp otyr.
