2019 jylǵy 1 qarashadaǵy jaǵdai boiynsha Qazaqstanda sheteldik jumys kúshin tartýǵa 20 myń 557 ruqsat berilgen, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Onyń ishinde birinshi sanatqa (basshylar men olardyń orynbasarlary) 816, ekinshi sanatqa (qurylymdyq bólimshelerdiń basshylary) 4 595 ruqsat shyǵaryldy. Sheteldik jumys kúshin (ShJK) tartýǵa arnalǵan ruqsattardyń kóp bóligi úshinshi (mamandar) jáne tórtinshi (bilikti jumyskerler) sanattaryna berildi – sáikesinshe 9 656 adam jáne 1 769 adam. Sondai-aq maýsymdyq jumystarǵa – 2 156, korporativtik aýysym aiasynda 1 565 adam tartylǵan.
Qazirgi ýaqytta Qazaqstanda ShJK paidalanatyn 2 210 jumys berýshi bar. Olarda Qazaqstannyń 518,8 myńǵa jýyq azamaty jumys isteidi, bul qyzmetkerlerdiń jalpy sanynyń 96%-yn quraidy.
Eńbekshi migranttardyń negizgi shyqqan elderi Qytai – 4 397 adam, Ózbekstan – 2 254 adam, Úndistan – 1 819, Túrkiia – 1 845, Ulybritaniia – 1 420 adam.
Ishki eńbek naryǵyn qorǵaý maqsatynda Qazaqstan Respýblikasynyń Úkimeti jyl saiyn respýblikaǵa sheteldik mamandardy tartýǵa kvota belgileitinin eske sala ketken jón.
2019 jylǵa sheteldik jumys kúshin tartý kvotasy respýblikanyń ekonomikalyq belsendi halqynyń 0,54%-y (shamamen 48,7 myń adam) deńgeiinde belgilendi.
