QR Premer-Ministri A. Maminniń tóraǵalyǵymen ótken Úkimet otyrysynda mal sharýashylyǵy salasyn damytý máseleleri talqylandy, dep habarlaidy "Ult aqparat".
Aýyl sharýashylyǵy ministri S. Omarovtyń aitýynsha, 2019 jyldyń I jarty jyldyǵynyń qorytyndysy boiynsha mal sharýashylyǵynyń jalpy ónimi ótken jyldyń osy kezeńimen salystyrǵanda 962,2 mlrd teńgeden 1063,5 mlrd teńgege deiin 10,5%-ǵa ulǵaidy.
Sońǵy jyldary mal sharýashylyǵy ónimderin óndirýde oń ósim baiqalady. Siyr etin óndirý 477 myń tonnany qurady, bul ishki tutynýdyń 98%-yn qamtamasyz etedi. Tiisinshe qoi eti 150 myń tonna, shoshqa eti 86 myń tonna boldy. 2018 jyldyń qorytyndysy boiynsha siyr eti boiynsha eksport kólemi 19,9 myń tonnany, qoi eti 3 myń tonnany, shoshqa eti 400 tonnany qurady.
«5 jyl ishinde tutynýdyń turaqty ósimi arqasynda qus etin óndirý kólemi 40%-ǵa artyp, 192 myń tonnany qurady. Bul rette qus etin tutyný da joǵary qarqynmen ósýde. Ónimdik jumyrtqany eksporttaý qarqyny ósýde, sondyqtan ótken jyldyń qorytyndysy boiynsha 850 mln dana jumyrtqa eksporttaldy», — dedi S. Omarov.
Sút óndirý kólemi 5,7 mln tonnany qurady. Iri qara maldyń sany 7,2 mln basqa deiin, qoi 18,7 mln basqa deiin, jylqy 2,6 mln basqa deiin, qus 44,3 mln basqa deiin ósti.
Ministrdiń aitýynsha, agroqurylymdardaǵy aýyl sharýashylyǵy maldary men qus basynyń ósýiniń oń dinamikasy saqtalýda.
AÓK damytýdyń 2017–2021 jyldarǵa arnalǵan memlekettik baǵdarlamasy sheńberinde Aýyl sharýashylyǵy ministrligi mal sharýashylyǵy salalaryn damytýdyń uzaq merzimdi salalyq baǵdarlamalaryn qabyldap iske asyrýda.
Etti mal sharýashylyǵyn damytýdyń uzaq merzimdi baǵdarlamasy 10 jyl ishinde bordaqylaý alańdary jáne et kombinattarymen kooperatsiialanyp jumys isteitin etti mal sharýashylyǵy men qoi sharýashylyǵynda 80 myń otbasylyq fermerlik sharýashylyqtardy qurýdy kózdeidi. Baǵdarlama siyr eti men qoi etiniń eksporttyq áleýetin arttyrýǵa baǵyttalǵan.
Sútti mal sharýashylyǵynyń uzaq merzimdi baǵdarlamasy sút ónimderiniń importyn almastyrýǵa baǵyttalǵan. Jalpy alǵanda, ónerkásiptik jáne otbasylyq úlgidegi sútti-taýarly fermalardyń sanyn arttyrý esebinen qaita óńdeý qýattylyǵyn tieý úshin sút óndirý kólemin 1 mln tonnaǵa ulǵaitý josparlanýda.
Qus sharýashylyǵyn damytý baǵdarlamasy qus etiniń importyn almastyrý úshin jańa óndiristik qýattar qurýdy kózdeidi. Qus etin óndirý kólemin 3 eseden artyq ulǵaitý josparlanýda.
Shoshqa sharýashylyǵyn damytý baǵdarlamasy Qytai naryǵyna shoshqa etin eksporttaýdy damytýǵa baǵyttalǵan. Jalpy shoshqa etin óndirý kólemin 2 esege ulǵaitý josparlanýda.
«100 naqty qadam» Ult jospary aiasynda strategiialyq investorlar men transulttyq kompaniialardy qaita óńdeý sektoryna tartý boiynsha jumystar júrgizilip jatyr.
Óz kezeginde «QazAgro» holdinginiń basqarma tóraǵasy E. Qarashókeev 2018 jyldyń qorytyndysy boiynsha holdingtiń 400 mlrd teńgege deiin AÓK qarjylandyrý kólemin aitarlyqtai arttyrǵanyn atap ótti. Bul mal sharýashylyǵynyń jáne jalpy aýyl sharýashylyǵynyń turaqty ósimin qoldaýǵa múmkindik berdi. 2018 jyly holding mal sharýashylyǵyn nesieleýge 114 mlrd teńge bóldi, bul berilgen zaimdardyń jalpy kóleminiń 30% quraidy. Mal sharýashylyǵy qurylymynda et sektoryna 96 mlrd teńgege, sútke 18 mlrd teńgege qarajat berildi.
«2019 jyly holding mal sharýashylyǵyn damytýǵa shamamen 134 mlrd teńge bólýdi josparlap otyr, bul rette qarjylandyrýdyń 60% holdingtiń enshiles kompaniialarynyń menshikti jáne tartylǵan qarajattarynan qamtamasyz etiledi», — dedi E. Qarashókeev.
Sonymen qatar, máseleni qaraý barysynda Batys Qazaqstan oblysynyń ákimi Ǵ. Esqaliev, Qyzylorda oblysynyń ákimi Q. Ysqaqov, Soltústik Qazaqstan oblysy ákiminiń orynbasary M. Tasmaǵanbetov, aýyl sharýashylyǵy kásiporyndarynyń basshylary — «Empire Food» kompaniiasynyń bas direktory A. Djavidan, «Makinsk qus fabrikasy» kompaniiasynyń vitse-prezidenti R. Toqseiitova sóz sóiledi.
