2018 jyly úsh ministrlik respýblikalyq biýdjetten bólingen qarajatty igere almady. Bul jaiynda búgin Úkimet úiinde ótken baspasóz máslihatynda QR Qarjy ministri Álihan Smaiylov málim etti, dep habarlaidy QazAqparat tilshisi.
«Memlekettik biýdjetti igerý 99,7 paiyzdy qurady. Jospar boiynsha 11 793 mlrd teńge igerilý kerek bolsa, is júzinde 11 758 mlrd teńge igerildi. Respýblikalyq biýdjet boiynsha bul kórsetkish - 99,99 paiyz. Jospardaǵy 9,7 trln teńgeniń 1,5 mlrd teńgesi igerilmegen. Onyń ishinde 17 mlrd teńge - bul shuǵyl jáne kútpegen shyǵystarǵa arnalǵan Úkimet rezerviniń qaldyǵy, 300 mln teńge - únemdelgen qarjy jáne 1,5 mlrd teńge - jetkizý sharttary talaptarynyń ózgerýi jáne jumys kestesinen qalys qalý esebinen igerilmen qarajat», - dedi ministr.
Onyń dereginshe, Qorǵanys jáne aeroǵarysh ónerkásibi ministrligi - 310 mln teńge, Bilim jáne ǵylym ministrligi - 255 mln teńge, Qorǵanys ministrligi 214 mln teńge biýdjet qarajatyn igere almaǵan.
«Jergilikti biýdjetter boiynsha igerý 99,7 paiyzdy qurady. Atqarylmaǵany - 16,1 mlrd teńge. Tómendegi óńirler josparlanǵan somanyń basym bóligin oryndai almaǵan: Mańǵystaý oblysy - 7,2 mlrd teńge, Qaraǵandy oblysy - 2 mlrd teńge, ShQO - 1,7 mlrd teńge», - dedi Á.Smaiylov.
Osy rette ministr 2018 jylǵy biýdjet shyǵystary negizinen áleýmettik salaǵa baǵyttalǵanyn erekshe atap ótti. Respýblikalyq biýdjette áleýmettik shyǵystar úlesi 2017 jyly 34 paiyz bolsa, ótken jyly bul kórsetkish 44,4 paiyzdy qurady. Shyǵystardyń basym bóligi halyqty aýyzsýmen qamtamasyz etý, áleýmettik infraqurylymdy damytý, joǵary bilimniń qoljetimdiligi men sapasyn arttyrý, shaǵyn kredit berýdi keńeitýge baǵyttalǵan.
«Rýhani jańǵyrý», «Nurly jer», «Nurly jol» jáne «Agrobiznes - 2020» baǵdarlamalary aiasynda is-sharalardy júzege asyrýǵa, sondai-aq jergilikti mańyzy bar joldardy jóndeýge aitarlyqtai qarajat bólindi, - dedi ol.
