QR Parlament Májilisiniń jalpy otyrysynda QR Aqparat jáne kommýnikatsiialar ministri Dáýren Abaev 2018 jyldyń sońyna deiin internette aqparatty baqylaýdyń avtomattandyrylǵan júiesin ázirleýdi josparlap otyrǵanyn aitty, dep habarlaidy Baq.kz tilshisi.
«Bizdiń basty jumys - internette, teledidarda taratylatyn aqparatty baqylaý. Aldaǵy jyldyń sońyna deiin baqylaýdyń avtomattandyrylǵan júiesin engizbekpiz. Atalǵan júie internetti baqylaidy. Iaǵni jelidegi aqparatqa sholý júrgiziledi. Árine, bul jumysty júzege asyrý úshin ýaqyt kerek, sebebi ol ońai sharýa emes. Biz bul jobany iske asyratynymyzǵa senimdimin», - dedi basshy.
Sondai-aq Dáýren Abaev quqyqqa qaishy kontentti baqylaityn qoldanystaǵy júie qalai jumys isteitinin túsindirdi.
Onyń aitýynsha, aldymen ministrlik saitqa eskertý joldaidy, keiinnen ony buǵattaidy.
«Biyl biz 3 myńǵa jýyq saitty buǵattadyq. Bul shara quqyqqa qaishy kontent (material saittan–avtor) alynbaǵan kezde qoldanylady. Bizdiń ministrlik quqyqqa qaishy materialdarǵa qatysty 270 myńǵa jýyq eskertýdi joldady. Iaǵni lańkestik, ekstremizm, pornografiia jáne basqa da osy tektes materialdar bolǵan. Máselen, áleýmettik jelide material paida boldy delik, biz barsha áleýmettik jelini bir material úshin buǵattai almaimyz. Sondyqtan da jeliniń ákimshisimen bailanysqa shyǵýǵa týra keledi. Al ákimshi óz kezeginde tiisti sharalardy qabyldaidy», - dedi ministr.
