2018 jyldan beri temirjol ótkelderindegi jol apatynan 22 adam zardap shekken. Onyń ekeýi kóz jumǵan, dep habarlaidy QazAqparat.
«Qazirgi tańda ortaq qoldanystaǵy qazaqstandyq joldarda avtokólik joldarymen qiysatyn 1 myńǵa tarta temirjol ótkeli bar. Respýblikalyq jelilerde mundai qiylystardyń sany - 139. Avtokólik joly men poiyz joly bir núktede qiysqan kezde, árine, atalǵan ótkelderdi kesip ótý erejelerin qatań saqtaý kerek. Poiyzdyń ótkelge jaqyndaǵanyna 2,5 shaqyrym qalǵan kezde baǵdarshamnyń ótýge tyiym salynatyn túsi janady, shlagbaým túsedi de, kólik quraldary toqtaýy tiis. Ótkeldi qorshaityn qurylǵysy bar temirjol ótkelderinde bári avtomatty túrde iske qosylyp, kólikter qaýipsiz tártipte toqtaidy», - dedi Indýstriia jáne infraqurylymdyq damý ministri Roman Skliar OQK-da ótken baspasóz máslihatynda.
Ministrdiń aitýynsha, temirjol ótkelderindegi erejelerdi jetildirý jumysyn qarai jalǵastyn tappaq.
«Biraq, ol erejelerdi jetildirý jumysyn biz ary qarai jalǵastyra beremiz. 2018 jyldan beri mundai ótkelderde 9 jol-kólik oqiǵasy tirkelip, onyń saldarynan 2 adam kóz jumdy, 20 kisi ártúrli dene jaraqatyn aldy. Osy jyldyń 8 aiynyń qorytyndysy boiynsha, bul jaǵdaidy qosqanda 6 oqiǵa tirkelip, 1 adam qaitys boldy, 15 adam zardap shekti. Biz bul jaǵdaida qosymsha qaýipsizdik sharalaryn qabyldaý úshin jumysty kúsheite beretin bolamyz», - dedi ministr.
Eske sala ketsek, keshe Shamalǵan stansasynda poiyz ben avtobýs soqtyǵysqan bolatyn.
Oqiǵa ornynda avtobýs júrgizýshisi mert bolyp, taǵy 3 adam Qarasai aýdandyq aýrýhanasynyń jansaqtaý bólimine jatqyzyldy.
Qazir atalǵan fakti boiynsha QR QK 345-babynyń 3-tarmaǵymen is qozǵalyp, tergeý júrip jatyr. Isti Bas kóliktik prokýratýra baqylaýyna aldy.
