Biylǵy jyldyń I toqsanynda qurylys jumystarynyń kólemi 7,1%-ǵa artty. Jalpy turǵyn úi qurylysyna 173,4 mlrd teńge bólingen, bul ótken jyldyń uqsas kezeńimen salystyrǵanda shamamen 14%-ǵa joǵary. Bul týraly Úkimet úiinde Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyn iske asyrý jumystarynyń qorytyndysy boiynsha ótken baspasóz konferentsiiasynda QR investitsiialar jáne damý ministri Jeńis Qasymbek habarlady.
«Biyldan bastap júzege asyrylyp jatqan «Nurly jer» baǵdarlamasy boiynsha 3,1 mln sharshy m turǵyn úi paidalanýǵa berilgen, bul 2016 jyldyń uqsas kezeńimen salystyrǵanda 125,3%-dy quraidy. Bir jylǵa josparlanǵan kólem – 10,2 mln sharshy m-diń 30% turǵyn úii paidalanýǵa berilgen», - dep Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Joldaýynyń 2017 jyldyń I toqsanynda iske asyrylý qorytyndysyn shyǵara otyryp, habarlady ministr.
Sonymen qatar, turǵyn úidiń jalpy aýdanynyń 93,2%-yn jeke qurylys salýshylar men halyq turǵyzǵan. Memlekettik sektor respýblikadaǵy turǵyn úidi paidalanýǵa berýdiń jalpy kóleminiń bar bolǵany 5%-yn qamtidy. Barlyǵy respýblika boiynsha 25 230 turǵyn úi paidalanýǵa berilgen, onyń 7 701-i - jeke úiler.
J. Qasymbek Memleket basshysy halyqqa Joldaýynda Úkimetke «Nurly jer» turǵyn úi baǵdarlamasyn iske asyrý aiasynda 15 jyl ishinde 1,5 million otbasyny turǵyn úimen qamtamasyz etý týraly tapsyrma bergenin eske salyp ótti.
