Aqtóbede 2016 jyly maýsymda bolǵan qarýly shabýylǵa qatysyp, 22 jylǵa sottalǵan Aidos Jubanov Arqalyqtaǵy ÝK-161/12 mekemesinde qaitys boldy. Onyń denesi 30 mamyr kúni Aqtóbege jetkizilip, qala syrtyndaǵy zirattardyń birine jerlengen. Bul týraly Jubanovtyń janazasyna qatysqandar habarlady, dep jazady Azattyq agenttigi.
Sottalǵan azamattyń qaza tapqanyn Qazaqstan qylmystyq-atqarý júiesi komiteti rastady. Komitet ókili "Jubanov ÝK-161/12 koloniiasyna týberkýlezi asqynyp kelgen edi. Osy ýaqytqa deiin túrme ákimshiligi ony qajetti em-dommen qamtamasyz etti" dedi.
Aty-jónin atamaýdy ótingen azamat Azattyqqa janazany uiymdastyryp, súiekti Aqtóbege jetkizýge qatysqanyn aitqan.
- Dini ortada "Aiýb" degen atpen tanymal Aidos Jubanovtyń ata-anasy burynyraqta qaitys bolǵan. Aiýb isti bolǵan soń áieli turmys quryp ketti. Et jaqyndary joq bolǵan soń súiegi Aqtóbege jamaǵattyń qarjylai qoldaýymen jetkizildi. Ol 27 mamyrda Arqalyqtaǵy túrmede týberkýlezden qaitys boldy. Janazasyna júzden asa adam jinaldy, - deidi aty-jónin atamaýdy ótingen taǵy bir azamat.
Aqtóbedegi qarýly shabýylǵa qatysqan 29 adamnyń jeteýi 2016 jyly 28 qarashadaǵy sot úkimimen ómir boiyna bas bostandyǵynan aiyrylǵan. Tergeý olarǵa "terrorizm aktisine qatysty", "adam óltirdi", "qarýdy zańsyz iemdendi", "shabýyl jasady", "adam urlady" dep aiyp taqqan.
Osy qylmystyq toptyń quramynda bolǵan Aidos Jubanov - 22 jylǵa, Azamat Abdrahmanov 20 jylǵa sottalǵan. Úkim shyqqannan keiin Aqtóbe oblystyq sotynyń baspasóz qyzmeti "Sottalýshylar Azamat Abdrahmanov pen Aidos Jubanov "Pallada" qarý-jaraq dúkenine shabýyl jasaǵan. Biraq dúkennen alyp shyqqan qarýlaryn tastap, jasyrynyp qalǵan. Olar terrorlyq toptyń ózge múshelerimen birge "Pantera" dúkeni men Ulttyq gvardiianyń 6655-áskeri bólimine, "Rodnikovka-Aqjar" blok postyna jasalǵan shabýyldarǵa qatyspaǵan" degen.
Tergeý materialdaryna qaraǵanda, Aidos Jubanov 1985 jyly Aqtóbe oblysynyń Muǵaljar aýdanynda týǵan. Buryn sottalyp, 2013 jyly 22 qańtarda bostandyqqa shyqqan. 2016 jylǵy 5 maýsym kúngi qarýly shabýyldan soń 22 jylǵa sottalyp, jazasyn Qostanai oblysy Arqalyq qalasyndaǵy ÝK-161/12 qatań rejimdi koloniiada ótegen.
2016 jyly maýsymda Aqtóbede 26 adam eki qarý-jaraq dúkenine shabýyldap, ulttyq gvardiianyń áskeri bólimin basyp alýǵa tyrysqan. Shabýyl men atystan resmi málimet boiynsha, 7 adam qaza taýyp, 40 shaqty adam jaralanǵan. Alty kúnge sozylǵan arnaiy operatsiiada shabýylǵa kúdikti delingen 18 adamnyń kózi joiylyp, birneshe adam ustalǵan.
Aita keteiik, Elbasy Nursultan Nazarbaev Aqtóbede shabýyl jasaǵandardyń "radikaldyq dini top ókilderi" bolǵanyn jáne olardyń "shetelden nusqaý alǵanyn" málimdegen edi.
