Foto: «AMANAT» partiiasynyń baspasóz qyzmeti
«AMANAT» Tóraǵasy Erlan Qoshanov partiianyń qazirgi jumysy jáne aldaǵy sailaý naýqanyna daiyndyq barysy týraly keńes ótkizdi. Is-sharaǵa ortalyq apparat qyzmetkerleri, belsendiler men óńirlik filialdardyń basshylyǵy qatysty.
Erlan Qoshanov aldymen partiialyqtardy tyńdap, aldaǵy sailaý naýqanyna daiyndyq máselesi boiynsha birqatar mindet júktedi.
«Bul sailaýǵa «AMANAT» úlken daiyndyqpen, zor senimmen bara jatyr. Kóp jumys atqarylýda. Bizdiń múmkindigimiz mol. Aqparattyq jáne kadrlyq resýrsymyz jetkilikti. Qalyptasqan dástúrli elektoratymyz, úlken tájiribemiz bar. Endigi mindet – jumysty durys uiymdastyryp, qoǵamdy ortaq maqsat jolynda jumyldyrý! Partiia eldegi júrgizilip jatqan reformalardyń aldyńǵy shebinde bolýy kerek. Bul – bizdiń basty maqsatymyz», - dedi Erlan Qoshanov.
Atqarýshy hatshy Elnur Beisenbaev óz baiandamasynda búgingi kúni Májilis pen máslihattarǵa kandidattardyń tizimin jasaý jáne 7 aqpanda Astana qalasynda ótetin partiia Sezine daiyndyq júrgizilip jatqanyn atap ótti.
Partiianyń sailaýaldy baǵdarlamasyn júzege asyrý qorytyndylary týraly VII sailanǵan Májilistegi partiia fraktsiiasynyń depýtaty Ekaterina Smyshliaeva habarlady.
«Eki jyl ishinde 5 jylǵa qoiylǵan mindetterdiń úshten biri tolyq kólemde oryndaldy. Tabiǵi gazben 140 eldi meken qamtamasyz etildi, 8,4 myń shaqyrym jergilikti jol jóndeldi, aýyz sýmen qamtamasyz etý boiynsha 200-den astam joba iske asyryldy. 84 myń orynǵa laiyqtalǵan mektepke deiingi uiymdar ashylyp, ondaǵy kezek tolyq avtomattandyryldy. Jalpy, Májiliste kóterilgen barlyq zań jobalarynyń 99%-y – «AMANAT» partiiasy fraktsiiasynyń bastamalary», - dedi eks-májilismen.
Sondai-aq, partiianyń sailaýaldy ýádelerin oryndaý aiasynda 200 myńnan astam oqýshy ornyna arnalǵan 502 mektep salyndy. Buǵan qosa, monoqalalarda, aýdan ortalyqtarynda jáne aýyldarda 2 myńnan astam mektep jańǵyrtyldy. Joǵary oqý oryndary men kolledjderdiń 20 myńnan astam stýdenti jataqhanaǵa ornalasty.
Óz kezeginde, partiia Hatshysy Eldar Jumaǵaziev «Aýyl amanaty» jobasynyń aralyq qorytyndysyn jasady. Ol partiianyń barlyq filialy atalǵan jobany júzege asyrýǵa baǵdarlanǵanyn airyqsha atap ótti.
«Prezidenttiń Sailaýaldy baǵdarlamasy aiasynda «Aýyl amanaty» jobasy iske qosyldy. Jergilikti atqarýshy organdarmen birlesip elimizdiń barlyq óńirinde 300 qanatqaqty aýyldyq okrýg tańdap alyndy. Biyl respýblikalyq biýdjetten osy maqsatta 52,4 mlrd teńge bólindi», - dedi Eldar Jumaǵaziev.
Partiia múshesi, belgili zańger Baqytjan Bazarbek «Jer amanaty» komissiiasynyń qyzmeti jóninde aitty.
«Komissiianyń aralasýymen aýyl sharýashylyǵy maqsatyndaǵy 3,2 mln gektar jer memleket menshigine qaitaryldy. Komissiianyń bastamasymen Aýyl sharýashylyǵy ministrligi ózge de memlekettik organdarmen birge qaitarylǵan jerlerdiń interaktivti kartasyn ázirledi. Sondai-aq, komissiia jumys barysynda el aýmaǵyndaǵy 3000-ǵa jýyq úleskerdiń quqyǵyn qorǵady», - dedi ol.
Quqyq qorǵaýshy Abzal Quspan keńeske qatysýshylardy Atyraý oblysynda qanatqaqty joba retinde qolǵa alynǵan «Quqyqtyq kómek» partiialyq bastamasy týraly habardar etti.
«Birinshi kezekte biz aýyldyq jerlerdegi halyqqa keńes berdik. Sebebi quqyqtyq sipattaǵy máselelerdi sheshý kezinde qala turǵyndarynyń múmkindigi kóbirek. Atyraý oblysynyń ártúrli aýdandarynda barlyǵy 100-den astam adam qabyldandy. Azamattardy aliment tóleý, turǵyn úidi jekeshelendirý, eńbek daýlary máseleleri tolǵandyrady», - dedi ol.
Keńeske qatysýshylarǵa partiianyń Atyraý oblystyq filialynda iske qosylǵan «AMANAT Service» qanatqaqty jobasynyń nátijesi jáne aldaǵy ýaqytta «AMANAT»-tyń qoldaýymen ótetin áielder forýmyna daiyndyq jumysy týraly málimet berildi.
