Almaty qalasynyń Kommýnaldyq infraqurylym jáne turǵyn úi inspektsiiasy basqarmasy "Almaty jastary" turǵyn úi baǵdarlamasy boiynsha ótinimderdi qaraýdy aiaqtap, irikteý nátijesin jariialady, dep habarlaidy ult.kz.
Vedomstvonyń málimetinshe, baǵdarlamaǵa qatysý úshin 5 363 azamat ótinim bergen. Qujattar 1–15 maýsym aralyǵynda kezekte.kz portaly arqyly qabyldandy.
Ótinimderdi qaraý barysynda keibir qatysýshylardyń jumys salasyn qate kórsetkeni anyqtalǵan. Basqarma muny tehnikalyq qatelik dep baǵalap, onyń baǵdarlamaǵa qatysý múmkindigine áser etpegenin málimdedi.
Tekserý qorytyndysynda 3 968 ótinim maquldandy. Biyl baǵdarlama aiasynda keminde 1 650 turǵyn úi nesiesin berý josparlanǵan. Osyǵan sáikes, dál osynsha úmitker tólem qabilettiligin rastaý úshin "Otbasy bank" AQ-ǵa joldama alady.
Joldamalar kezektiń jinalyp qalmaýy úshin kezeń-kezeńimen taratylady. Ár apta saiyn 550 qatysýshyǵa joldama jiberiledi.
Tólem qabilettiligi rastalǵannan keiin qatysýshylarǵa 45 kúntizbelik kún ishinde bastapqy nemese qaitalama turǵyn úi naryǵynan baspana tańdap, 20 million teńgege deiin ipotekalyq nesie rásimdeý múmkindigi beriledi.
Eger joldama alǵan azamattardyń bir bóligi tólem qabilettiligin dáleldei almasa nemese belgilengen merzimde turǵyn úi tańdamaǵan jaǵdaida, olardyń ornyna oń sheshim alǵan kelesi úmitkerler shaqyrylady. Bul bólingen qarajattyń tolyq ári tiimdi igerilýin qamtamasyz etedi.
Sonymen qatar 1 395 ótinim baǵdarlama talaptaryna sáikes kelmegen. Bas tartýǵa negiz bolǵan negizgi sebepter – úmitkerdiń jeke menshiginde turǵyn úidiń bolýy, sońǵy bes jyl ishinde baspanasyn ielikten shyǵarýy nemese sońǵy alty aida mindetti zeinetaqy jarnalarynyń aýdarylmaýy.
Ótinimi maquldanǵan jáne bas tartylǵan azamattardyń tizimi kezekte.kz portalyndaǵy ALMATY JASTARY servisiniń «Turǵyn úi qyzmetteri» bóliminde jariialanady.
